Дипика Падукон — замонавий Болливуднинг энг машҳур ва нуфузли актрисаларидан бири. У 1986 йилда Даниянинг Копенгаген шаҳрида туғилган, аммо Ҳиндистонда ўсган. Унинг отаси — машҳур бадминтончи Пракаш Падукон бўлиб, Дипика ҳам ёшлигида спорт билан шуғулланган. Бироқ унинг қалби кино санъатига ошно бўлиб, актрисалик йўлини танлади.
Унинг катта экрандаги дебюти 2007 йилдаги “Om Shanti Om” фильмида бўлиб, Шоҳрух Хон билан бирга суратга тушди. Бу роль унга катта шон-шуҳрат келтирди. Кейинчалик у “Chennai Express”, “Padmaavat”, “Piku”, “Yeh Jawaani Hai Deewani” каби хит картиналарда ижро этди.
Дипика нафақат Болливуд, балки Голливудда ҳам ўзини синаб кўрди — у “xXx: Return of Xander Cage” фильмида Вин Дизел билан бирга рол ижро этди.
Дипика Падуконнинг шахсий ҳаёти ҳам кўпчиликнинг диққат марказида. У 2018 йилда Болливуднинг машҳур актёри Ранвир Сингхга турмушга чиқди. Уларнинг тўйи Италияда ўтказилиб, бутун дунёда катта қизиқиш уйғотди. Жуфтлик Болливуднинг энг чиройли ва уйғун оилаларидан бири сифатида танилади.
Дипика жамоат ишларида ҳам фаол — у руҳий саломатлик масалаларида очиқ гапириб, “Live Love Laugh” номли хайрия фондини таъсис этган. Бу орқали у депрессия ва руҳий қийинчиликларга дуч келган инсонларга ёрдам беришни мақсад қилади.
Filmfare Awards мукофотига бир неча бор сазовор бўлган. Forbes журнали уни дунёдаги энг нуфузли ва юқори маошли актрисалар рўйхатига киритган. У “TIME 100” — дунёдаги энг таъсирчан инсонлар рўйхатидан ҳам ўрин олган.
Бугунги кунда Дипика Падукон Болливуд юлдузи, Голливуд актрисаси ва жамият учун муҳим ташаббусларни амалга оширган кучли хотин-қиз сифатида танилади.
