«Миллион» жамоаси аъзоси Аҳмад Темуров «ИнтервюТВ»га берган суҳбатида жамоа қандай ташкил топгани ва ном қандай танлангани ҳақида қизиқарли хотиралар билан ўртоқлашди.
Унинг айтишича, «Миллион» жамоасининг шаклланиши оддий бир чойхонада бошланган. Бир гуруҳ дўстлар йиғилиб, янги жамоа тузиш ва унга муносиб ном қўйиш ҳақида ўйлай бошлашган. Ҳар ким ўз таклифини билдирган, турли номлар муҳокама қилинган.
— Агар адашмасам, учта вариант бўлган: «Браво», «Миллион» ва яна тарихийроқ бир ном. Унинг аниқ қандай бўлгани эсда қолмаган, балки «Афросиёб»га ўхшашроқ ном бўлган, — дейди Аҳмад Темуров.
Суҳбат давомида у «Миллион» номини айнан Миркомил ака таклиф қилганини таъкидлади. Кўпчиликка айнан шу ном маъқул келган ва жамоа шу ном билан фаолият бошлаган. Шу билан бирга, Даврон акага «Браво» номи ёққани учун компанияга «Браво Эвент Манагемент» деб ном берилган.
— Шундан кейин жамоа тузилиб, ҳаракат бошланди. Саҳнада ижод қилдик, Даврон ака концертларни ташкил қилдилар. Биринчи концертимиз, кўз тегмасин, жуда муваффақиятли ўтган, — дея қўшимча қилди у.
Бошловчи концертлар неча кун давом этгани ҳақида сўраганда, Аҳмад Темуров дастлаб икки кун бўлган деган тахминни рад этиб, илк чиқишлар уч ёки тўрт кун давом этганини маълум қилди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
