Актёр ва блогер Бобур Мансуров “Ўзбекистон Республикаси Маданият ва санъат ходимлари куни” муносабати билан “Маданият ва санъат фидокори” кўкрак нишони билан тақдирланди.
Ушбу мукофот ижтимоий тармоқларда турли фикр ва баҳсларга сабаб бўлди. Мансуров бу ҳолатга муносабат билдириб, мукофот ноҳақ берилгани ҳақидаги фикрларга қўшилмаслигини таъкидлади.
Унинг сўзларига кўра, ҳар кимга бирдек ёқиш мумкин эмас ва ижод ҳам барча томонидан бир хил қабул қилинмайди. Актёр 12 йилдан буён санъат соҳасида фаолият юритиб келаётганини айтди.
У сериаллар, спектакллар ва турли тадбирларда, ҳатто баъзан ҳақ тўланмасдан ҳам ишлаганини қайд этди.
Шу билан бирга, давлат тадбирлари ва ижтимоий роликларда иштирок этгани ҳам унинг меҳнати баҳоланганини кўрсатишини таъкидлади. Мансуровнинг фикрича, ижодкорларни доимий танқид қилиш эмас, балки қўллаб-қувватлаш муҳим.
Унинг таъкидлашича, агар ижод аҳли доимий равишда танқид остида қолса, соҳанинг ривожланиши секинлашиши мумкин.
“Zamin”ни Telegram'да ўқинг!
