10:17 / 30.10.2020
1 103

Қозоғистон «Борат»ни енга олмади. Энди мамлакат сайёҳларни жалб этиш учун унинг иборасидан фойдаланмоқда

Қозоғистон «Борат»ни енга олмади. Энди мамлакат сайёҳларни жалб этиш учун унинг иборасидан фойдаланмоқда
Фото: «Krpress.ru»
Қозоғистон ва «Борат» фильми муаллифлари ўртасидаги муносабатлар мураккаб. Актёр Саша Барон Коэн ушбу фильмда мамлакатни жуда қолоқ, унинг фуқароларини жуда оми қилиб кўрсатгани туфайли ундан узоқ вақт хафа бўлиб юришган. Аммо фильм чиққанидан кейинги 14 йил ичида нимадир ўзгарганга ўхшайди, деб ёзади Meduza.

Иккинчи «Борат» фильми премьераси арафасида Қозоғистон ичида туризмни реклама қилишга масъул бўлган Казакҳ Тоурисм миллий компанияси «Казахстан. Нраица!» (инглизчада «Kazakhstan. Very nice!» деб янграйди) шиори билан реклама чиқарди. Бу иборани Коэннинг қаҳрамони, қозоғистонлик журналист Борат Сагдиев фильмда ҳадеб такрорлайверади.

The New York Times газетаси реклама муаллифлари билан боғланди. Улар Қозоғистон телевидениесида саёҳатлар ҳақидаги кўрсатув бошловчиси америкалик Деннис Кин ва унинг ҳамкасби, режиссёр Ермек Утемисов бўлиб чиқди. «Нраица!» иборасини реклама шиорига айлантириш таклифи билан улар Kazakh Tourism’га мурожаат қилган.

Утемисовнинг фикрича, 14 йил ичида Қозоғистонда янги авлод етишиб чиққан, улар Коэнни яхши кўради, унинг юморини тушунади ва ҳеч нарсадан хафа бўлмайди.

Коэннинг ўзи эса унинг фильмларидаги Қозоғистон ҳақиқий Қозоғистонга ҳеч қандай алоқаси бўлмаган «сохта» мамлакат эканлигини айтган. Америкаликлар бу мамлакат ҳақида деярли ҳеч нарса билмаганлиги учунгина у айнан Қозоғистонни танлаган. Коэннинг ўзи Қозоғистонни «ажойиб», унинг аҳолисини эса мағрур ва замонавий деб ҳисоблайди.

Эслатиб ўтамиз, актёр ва комедиант Саша Барон Коэн «Диктатор» ва «Борат» фильмларидаги роли сабаб Қозоғистон ва Тожикистонга кириши тақиқланган.
Ctrl
Enter
Хато топдИнгизми?
Иборани ажратиб Ctrl+Enter тугмасини босинг
Фикрлар (0)

Маданият янгиликлари