Наоя Иноуэ ва Муроджон Аҳмадалиев жанги тасдиқланди

Супер енгил вазн тоифасининг мутлақ чемпиони япониялик Наоя Иноуэнинг навбатдаги икки жанги расман тасдиқланди. The Ring нашрининг хабар беришича, Иноуэнинг промоутерлари америкалик Рамон Карденас ва ўзбекистонлик Муроджон Аҳмадалиев билан жанг ўтказиш бўйича келишувга эришган.

Унга кўра, Наоя Иноуэ (29-0, 26 КО) дастлаб 4 май куни Лас-Вегасда Рамон Карденасга (26-1, 14 КО) қарши рингга чиқади. Агар у ушбу жангда ғалаба қозонса, 14 сентябрь куни Токиода Муроджон Аҳмадалиев билан тўқнаш келади.

Ўзбекистонлик боксчи Муроджон Аҳмадалиев (13-1, 10 КО) ҳозирда WBA вақтинчалик чемпионлик камарига эга. У анчадан бери Иноуэ билан жанг қилишни талаб қилиб келган. Агар япониялик боксчи унга қарши рингга чиқишдан бош тортганда, WBA ташкилоти Иноуэдан чемпионлик камарини олиб қўйиши мумкин эди.

Аҳмадалиевнинг промоутери Эдди Хирн ва менежери Вадим Корнилов Иноуэнинг промоутерлари билан келишувга эришиб, Иноуэ Карденасни енгса, кейинги рақиби Аҳмадалиев бўлиши бўйича шартнома имзолашди.

Бу жанг учун Муроджон Аҳмадалиев узоқ кутган ва Иноуэнинг ундан қочаётганини таъкидлаган. “Тҳе Monster” лақабли япониялик чемпион эса бу даъволарни рад этиб келган. Агар Наоя Иноуэ Муроджон Аҳмадалиевни мағлуб этса, у декабрь ойида Саудия Арабистонидаги “Riyadh Season” мусобақасида навбатдаги жангини ўтказиши режалаштирилган.

Аҳмадалиев эса ушбу имкониятдан фойдаланиб, дивизионнинг мутлақ чемпиони бўлишни мақсад қилган.

Наоя Иноуэ Муроджон Аҳмадалиев Бокс Янгиликлар