Аббосбек Файзуллаевнинг ўйинидаги тушкунлик сабаби нима? Мутахассис фикрини билдирди

Москванинг «ЦСКА» клуби собиқ футболчиси Александр Гришин жамоанинг ўзбекистонлик қанот ҳужумчиси Аббосбек Файзуллаевнинг жорий мавсумдаги ўйинларига ўз муносабатини билдирди. Унинг таъкидлашича, «армиячилар»нинг тактик схемасидаги ўзгаришлар футболчининг кўрсатаётган натижаларига салбий таъсир ўтказмоқда.

«Файзуллаев табиатан қанот ҳужумчиси. У айнан қанотда, эркин ва тезкор ҳаракатлари билан ўйинни ёрқинроқ кўрсата олади. Ҳозир эса мураббийлар уни ўзининг анъанавий бўлмаган позицияларда ишлатишмоқда. Бу Аббосбекда ноқулайлик ва ишончсизликни келтириб чиқаряпти. Шунинг учун баъзи пайтларда у майдонда ўзини йўқотиб қўяди. Агар унинг эски ўрнига қайта қўйишса, яна аввалгидай ёрқин ўйинларини кўрсата бошлайди», – дейди Гришин.

Маълумот учун, 21 ёшли иқтидорли футболчи ушбу мавсумда «ЦСКА» таркибида Россия Премьер Лигаси ҳамда мамлакат кубоги доирасида ўтказилган 32 та учрашувда майдонга тушган ва бу ўйинларда 3 та гол киритиб, 7 марта самарали пас берган. Клуб билан унинг шартномаси 2026 йил ёзигача мўлжалланган бўлиб, Transfermarkt портали унинг ҳозирги бозор нархини 8 миллион евро атрофида баҳоламоқда.

Аввалроқ, Аббосбек Файзуллаевнинг ўйин услубига Туркиянинг нуфузли клубларидан бири – «Галатасарой» жиддий қизиқиш билдиргани ҳақида хабарлар тарқалган эди. Бундан ташқари, шу йилнинг қишки трансфер ойнаси вақтида португалиялик машҳур клуб «Бенфика» билан келишув амалга ошмай қолгани ҳам маълум қилинганди.

Ҳозирча унинг «ЦСКА»даги истиқболига нисбатан саволлар очиқ қолмоқда. Бироқ мураббийлар томонидан ўзининг анъанавий қанот позициясига қайтарилса, ёш ва иқтидорли футболчи яна мухлисларни ўзининг тезкор ва ёрқин ўйинлари билан хурсанд қилиши мумкин. «Замин»ни Telegram’да ўқинг!