«Пахтакор» бош мураббийи вақтинчалик таътилга чиқди: клубни энди Камолиддин Тожиев бошқаради

Тошкентнинг «Пахтакор» футбол клуби португалиялик бош мураббийи Педру Морейра саломатлиги билан боғлиқ муаммолар сабаб қисқа муддатли таътилга чиққани ҳақида расмий хабар тарқатди.

"Педру Морейра соғлиғи туфайли вақтинчалик таътилга чиқишга қарор қилди. Унинг йўқлигида «шерлар» жамоаси бош мураббий вазифасини собиқ устоз Камолиддин Тожиев вақтинчалик бажариб туради", – дея клуб матбуот хизмати хабар қилди.

Маълумотларга кўра, Морейранинг соғлиғи билан боғлиқ вазият кўплаб мухлисларни ташвишга солди. «Пахтакор» раҳбарияти унинг тезроқ тикланиб, яна жамоани бошқаришга қайтишига умид қилмоқда.

Португалиялик мутахассиснинг кетиши ҳақида аввалроқ баъзи оммавий ахборот воситаларида хабарлар пайдо бўлганди. Аммо «Пахтакор» клуби бу хабарларга аниқлик киритиб, мураббийнинг жамоани тарк этмаганини, балки вақтинчалик дам олишга чиққанини маълум қилди.

Эслатиб ўтамиз, Педру Морейра «Пахтакор»ни ўтган йилнинг декабрь ойида қабул қилиб олган эди. Унинг бошчилигида жамоа Суперлигада кутилганидек яхши натижалар кўрсата олмади ва ҳозирда турнир жадвалида бор-йўғи 9 очко билан 11-ўринда турибди. Бу эса мухлислар ва клуб раҳбариятини ҳам ташвишга солаётгани табиий ҳол.

Жамоани вақтинча қабул қилиб олган Камолиддин Тожиев эса «Пахтакор» учун нотаниш шахс эмас. У аввал ҳам клубни бошқарган ва ўз вақтида жамоани юқори натижаларга эриштирган тажрибали маҳаллий мутахассис ҳисобланади. Ҳозирча у «шерлар»ни мураккаб вазиятдан олиб чиқиш учун барча куч-ғайратини ишга солиши кутилмоқда.

«Пахтакор»нинг навбатдаги ўйинларда қандай натижалар қайд этиши ва бу ўзгаришлар жамоа фаолиятига қанчалик таъсир кўрсатиши мухлисларнинг диққат марказида бўлиб турибди. Клуб раҳбарияти эса вазиятдан тезроқ чиқиш учун барча имкониятларни ишга солишга ваъда бермоқда. «Замин»ни Telegram’да ўқинг!