Асрор Алиқулов: «Жамоамизда ишонч етишмаяпти, лекин рақиблардан қўрқмаяпмиз»

Ўзбекистон Суперлигаси 9-тури доирасида бўлиб ўтган «Машъал» – «Қизилқум» (2:2) баҳсидан кейин мезбонлар устози Асрор Алиқулов ўйиндан кейинги матбуот анжуманида иштирок этиб, журналистларнинг саволларига атрофлича жавоб берди.

— Учрашув ҳақида фикрингиз?
— Бугунги беллашувга жуда яхши киришиб олдик. «Қизилқум» жамоасининг ўйин услуби ва таркибидаги бўйдор футболчилар борлигини олдиндан таҳлил қилгандик. Улар билан ўз жамоамизнинг имкониятларини солиштириб чиқдик. Илк дақиқаларда яхши ўйнаб, гол киритишга ҳам эришдик. Бироқ иккинчи тайм бошида диққатсизликларга йўл қўйдик. Ҳимоя чизиғимиздаги жиддий хатолар натижасида гол ўтказиб юбордик. Охиригача таслим бўлмай ўйнадик ва ҳисобни тенглаштирдик. Менимча, бугунги дуранг ҳам ёмон натижа эмас.

— Сиз аввал «Қизилқум» жамоасида ҳам фаолият юритгансиз. Бу рақибни ўрганишингизда қийинчилик туғдирмадими?
— Бу ҳақида ўйламадим. «Қизилқум»нинг ҳозирги таркиби кучли ва мен билган пайтдан анча ўзгарган. Умуман олганда, рақиб жисмоний жиҳатдан ва яккакурашларда кўпроқ устунлик қилди.

— Бугун Муртозаев ва Машович иккитадан гол урди. Сизнингча, улардан қайси бири кучлироқ?
— Албатта, ўз футболчимни кучли деб биламан (кулади). Машович жисмонан бақувват, майдонда фаол ва агрессив ҳаракат қилади. Охирги ўйинларда яхши формага кириб қолди ва самарали ҳаракат қилмоқда.

— Жамоангиз 9 ўйинда 6 та гол урди. Бу сизга камлик қилмаяптими?
— Тўғри, кўп гол ўтказиб юбораётганимиз ҳам бор. Бироқ гол уришимиз кўпайиши кераклигини тан оламан. Ҳозир кийиниш хонасида ҳам бу ҳақида гапирдим. Зич ва тартибли ўйин ҳозирги Суперлиганинг асосий талабларидан бири.

— «Машъал» Про-лигадан кўтарилиб, Суперлигага тўлиқ мослашиб кетдими?
— Айрим омадсиз учрашувларимиз бўлди. Лекин рақиблардан қўрқиб майдонга тушмаяпмиз. Бизга бироз ишонч етишмаяпти. Чунки айрим футболчиларимиз бу йил биринчи марта Суперлигада ўйнашмоқда.

— Футболчиларнинг жисмоний кўрсаткичлари қай тарзда назорат қилинади? Бир ўйинда қанча масофа босиб ўтишаяпти?
— Бу нарса доимий назоратимизда. Бизда энг кўп масофа босган футболчининг натижаси 12 километр бўлган. Лекин афсуски, бундай кўрсаткичга эга бўлган футболчиларимиз жуда кам. Айрим ўйинчиларнинг ёши ва бошқа омилларни ҳам ҳисобга олиш керак. Энг кўп югураётган футболчимиз Жавоҳир Абдуалимов бугун оилавий сабабларга кўра ўйин қайдномасига киритилмади.

— «Машъал»нинг уй учрашувлари Ғузорда ўтказиляпти. Кейинги ўйинлар ҳам шу ерда давом этадими?
— Бу масалани клуб раҳбарияти ҳал қилади. Олмалиқда эмас, Ғузорда ўйнаш биз учун қулайроқ эканини айтмоқчиман. Бу масалада клуб раҳбарияти ҳамда «Шўртан» клубига алоҳида миннатдорчилик билдирмоқчиман. Улар бизга ўйинларни бу ерда ўтказиш учун шароит яратиб беришмоқда. Лекин кейинги ўйинларнинг қаерда ўтиши ҳақида аниқ маълумот бера олмайман. Бу клуб раҳбариятининг қарорларига боғлиқ.

Манба: championat.asia «Замин»ни Telegram’да ўқинг!