Теренс Кроуфорд: Сауль Альваресни мағлуб этишга тайёрман!

Бокс олами яна бир катта ва тарихий жангга тайёрланмоқда — америкалик чемпион Теренс Кроуфорд ҳамда мексикалик супер юлдуз Сауль “Канело” Альварес ўртасидаги беллашув миллионлаб мухлислар эътиборида. Икки чемпион ўртасидаги тўқнашув 13 сентябрь куни Лас-Вегасдаги машҳур ареналардан бирида бўлиб ўтади ва катта шавқ-у шовқин билан ўтади, деган умид бор.

Теренс Кроуфорд ўзининг матбуотга берган интервьюсида бу жангга бўлган ишончи ва интилишини очиқ билдирди. “Мен дунёнинг энг зўр боксчисиман. Бенуқсон рекордим ва 41 ғалабам, 31 нокаутим шуни тасдиқлайди. 13 сентябрда Саульни мағлуб этиб, ўз устунлигимни бутун дунёга яна бир бор намоён қиламан”, — деди америкалик маҳоратли спортчи.

Маълумот учун, Кроуфорд ҳозирча профессионал рингда мағлубият таъмини тотмаган ягона чемпионлардан бири. Унинг рақиби — Сауль Альварес эса 62 ғалаба, 2 мағлубият ва 2 дуранг натижаси билан жаҳон боксининг ҳақиқий юлдузи сифатида танилган. Шунинг учун ҳам, бу тўқнашув жаҳон бокс жамоатчилигида катта қизиқиш уйғотган.

Бокс экспертлари ва мухлислар бу жанга алоҳида эътибор қаратаётгани бежиз эмас. Чунки, ҳар икки боксчи ҳам ўз вазн тоифасининг кутилган ва синовдан ўтган чемпионлари саналади. Улар жаҳон рўйхатининг юқори поғоналарида мустаҳкам ўрин эгаллаган. Бу эса, 13 сентябрь куни Лас-Вегасдаги тўқнашувни йилнинг энг катта бокс воқеалари қаторига қўшади.

Жанг куни яқинлашар экан, ҳар икки боксчи ҳам машғулотларни янада кучайтирмоқда. ОАВда тарқалган хабарларга кўра, Кроуфорд ва Альвареснинг жамоалари ҳар бир жиҳатга эътибор беряпти — тайёргарлик, стратегия, руҳий тайёрлик ва албатта мухлислар қўллаб-қуввати.

Қайд этиш жоизки, бу жанг нафақат унвонлар, балки икки боксчи обрўси ва нуфузи учун ҳам жиддий синовга айланади. Ғолиб нафақат миллионлаб мухлисларнинг олқишига, балки профессионал боксда янги саҳифа очиш имконига эга бўлади.

Бокс дунёси эса 13 сентябрь куни Лас-Вегасда бўлиб ўтадиган ушбу улкан жанг натижасини катта қизиқиш билан кутмоқда. Яна бир тарихий тўқнашувга гувоҳ бўлишга тайёрланинг! «Замин»ни Telegram’да ўқинг!