Россиянинг машҳур клубларидан бири — Москванинг ЦСКА жамоаси янги бош мураббий тайинлади. "Қизил-кўклар" клуби расман 49 ёшли швейцариялик мутахассис Фабио Челестини билан "2+1" схемаси асосида шартнома имзолаганини эълон қилди. Янги мавсумдан бошлаб у легионеримиз Аббосбек Файзуллаев тўп сураётган жамоага раҳбарлик қилади.
Мураббийлар штаби ҳам сезиларли даражада янгиланмоқда. Челестинига мураббий ёрдамчилари сифатида Мaнел Экспосито, Хавер Ноя, Хосе Блеса ва жисмоний тайёргарлик бўйича мутахассис Данте Кареччи ёрдам беради.
Фабио Челестини 2024/25 йилги мавсумда Швейцариянинг "Базел" клубини бошқариб, мамлакат чемпионати ва Кубогида ғалаба қозонган. Унинг муваффақиятли натижалари Европа футболида мураббий сифатидаги нуфузини янада оширди. Илгари у "Лозан", "Лугано" ва "Сьон" каби Швейцариянинг бир қатор профессионал клубларида бош мураббий сифатида фаолият юритган.
Футболчи сифатида эса Челестини Швейцария терма жамоаси шарафини ҳимоя қилган. Шунингдек, у Европанинг етакчи клубларидан бўлган "Марсел" (Франция), "Лозан" (Швейцария), "Хетафе" ва "Леванте" (Испания) жамоалари сафида ҳам майдонга тушган.
ЦСКАда эса сўнгги мавсумни сербиялик мутахассис Марко Николич бош мураббий сифатида ўтказган эди. У жамоани Россия Кубогида ғалаба сари етаклаганидан сўнг, жамоа билан хайрлашган.
Челестинининг тайинланиши ЦСКАда янги босқич бошланганидан далолат беради. Футбол мухлислари энди жамоанинг янги бош мураббий остида қандай ўйин намойиш этишини катта қизиқиш билан кутмоқда. Аббосбек Файзуллаев каби ёш истеъдодлар учун ҳам бу янги имконият ва янги савияда ўсиш босқичи бўлиши мумкин. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
