Англия Премьер-лигасининг 5-туридан ўрин олган марказий баҳс Лондондаги «Эмирейтс» стадионида ўтди. Унда «Арсенал» ўз майдонида амалдагӣ чемпион «Манчестер Сити»ни қабул қилди ва кескин курашларга бой тўқнашув 1:1 ҳисобида якунланди.
Ушбу натижа Микел Артета учун муҳим тарихий марра бўлди. Испан мутахассиси Пеп Гвардиоланинг жамоасига қарши АПЛ доирасида кетма-кет бешта ўйинда мағлубиятга учрамаган илк мураббийга айланди. Шу давр ичида «тўпчилар» «Сити» устидан икки марта ғалаба қозониб, яна уч маротаба дуранг қайд этишди.
Гвардиоланинг «Арсенал»га қарши охирги йирик зафари 2023 йилнинг апрел ойига тўғри келади. Ўшанда «Сити» «Этиҳад»да рақибини 4:1 ҳисобида таслим этган эди. Шундан буён икки жамоа ўртасидаги тўқнашувларда «канонирлар»нинг тобора кучайиб бораётгани яққол кўзга ташланмоқда.
Статистик маълумотларга кўра, Артета ва Гвардиола мураббий сифатида ҳозиргача 15 марта юзма-юз келган. Уларнинг 8 тасида Пепнинг қўли баланд келган бўлса, 4 учрашувда Артета ғалаба қозонган. Яна 3 марта беллашув мувозанат билан якун топган.
Мутасаддилар таъкидлашича, бу серия «Арсенал»нинг чемпионлик йўлидаги жиддий имкониятларидан бири сифатида қаралмоқда. Чунки охирги мавсумларда «Сити»га қарши ўйинларда кўпинча маглубиятга учраб келган «канонирлар» энди рақобатга тайёр эканини намойиш этмоқда.
«Замин»ни Telegram’да ўқинг!
