Германия Бундеслигасининг 5-тури доирасида том маънодаги голлар ёмғири кузатилди. Мюнхенгладбахнинг «Боруссия М» клуби ўз майдонида «Айнтрахт»ни қабул қилди ва ўйин жамоатчиликни ҳайратда қолдирди. Учрашув 10 та голга бой бўлиб, 4:6 ҳисобида меҳмонлар ғалабаси билан якунланди.
Беллашувнинг илк қисмида Франкфурт жамоаси ҳақиқий ҳужумкор ўйин намойиш этди. Меҳмонлар кетма-кет зарбалар билан рақибни чалғитиб, қисқа вақт ичида ҳисобни 6:0 кўринишига олиб келди. Кох икки марта тўп киритди (11 ва 47-дақиқалар), Кнауфф (15), Буркардт (35), Чаиби (39) ҳамда Узун (45+1) ўз номларини таблога ёздирди.
Бироқ «Боруссия М» ҳам таслим бўлмади. Иккинчи бўлим ўртасидан сўнг мезбонлар ўз мухлислари олдида обрўни сақлаб қолиш учун ҳужумга ташланишди. Кастроп 72-дақиқада ҳисобни очди, Табакович 78-дақиқада иккинчи голни урди. Кейин Энгелхардт (83) ва Ранос (90+9) яна икки тўп киритиб, ҳисоби 4:6 кўринишига келтиришди. Аммо вақт мезбонларнинг тўлиқ қайтишига имкон бермади.
Бундеслига. 5-тур
«Боруссия М» — «Айнтрахт» 4:6
Голлар: Кастроп (72), Табакович (78), Энгелхардт (83), Ранос (90+9) — Кох (11, 47), Кнауфф (15), Буркардт (35), Чаиби (39), Узун (45+1).
Шу тариқа, «Айнтрахт» ушбу йирик ғалабадан сўнг очколарини 9 тага етказиб, турнир жадвалида 4-поғонага кўтарилди. «Боруссия М» эса 2 очко билан чемпионатдаги энг пастки ўринда қолиб кетди.
Мюнхенгладбах мухлислари учун ушбу кеча оғир кечди, бироқ учрашув Бундеслига тарихидаги энг томошабоп ва драматик ўйинлардан бири сифатида ёдда қолиши аниқ.
«Замин»ни Telegram’да ўқинг!
