Матвей Сафоновга Париждан кетиш вақти келди. Бу унинг заифлиги эмас, аксинча, у захирада қолиб чанг босаётган ўйинчига айланиш учун жуда кучли.
Ўтган мавсумда Сафонов бир нечта ўйинларда қатнашди, бир қатор қутқаришлар амалга оширди, еттита "қуруқ" ўйин ўтказди ва мукофотлар ютди. Бундай натижалар оддий захира футболчисига хос эмас.
У Европага қийинчиликларни енгиш учун келган ва уларни топди. Бироқ, жамоа бош мураббийи Луис Энрике француз дарвозабони Люк Шевальени асосий танлов сифатида белгилади.
Энрике Шевальени узоқ муддатли лойиҳа сифатида кўраётганини очиқ айтган. Ҳозирги вақтда Шевалье барча турнирларда дарвоза чизиғини ҳимоя қилмоқда, Сафонов эса ҳатто миллий кубок ўйинларида ҳам майдонга туширилмаяпти.
L’Équipe нашри шарҳловчиси Уго Деломнинг сўзларига кўра, Сафонов ҳозирда "иккинчи рақам" ҳисобланади ва фақат Шевалье жароҳат олиши ёки жиддий хатоси туфайли ўз имкониятини олиши мумкин. Сафонов бу вазиятга бардош бериб келди.
У аввалига Европада қийинчиликларни енгиш учун келганини таъкидлади, кейинчалик эса захирада қолишдан норозилигини билдирган эди. Ҳозир эса у очиқчасига ўйин вақти йўқлигидан қониқмаётганини айтмоқда.
GOAL нашрининг хабар беришича, ПСЖ раҳбарияти Сафоновнинг оммавий баёнотларидан норози ва бу ҳолат Европа чемпионлари обрўсига путур етказмоқда. Чунки октябрь ойи охирига келиб, Сафонов умуман майдонга тушмади.
Ҳеч бир дарвозабон узоқ вақт захирада қолиб ривожлана олмайди. Шевальенинг маҳорати ёмон эмас. У дарвоза олдидаги ҳаракатлари ва узоқ паслари билан ажралиб туради. Аммо унинг ҳам темп йўқотиши ва чиқишда хатоларга йўл қўйиши кузатилган.
Собиқ жаҳон чемпиони Лионель Шарбоне "After Foot" дастурида Шевальенинг дарвоза учун ҳали тўлиқ тайёр эмаслигини тан олган ва "Страсбург"га қарши ўйинда иккинчи голни ўтказиб юбормаслиги керак эди, деб айтган. У Луис Энрике аввал Доннаруммани захирага ўтказиб, Сафоновга имконият берганини эслатди.
Демак, яна бир имконият берилиши мумкин. Матвей Сафонов атрофида кўп гап-сўзлар юрмоқда.
Live Foot нашрининг хабар беришича, ПСЖнинг спорт директори Луис Кампуш бошқа жамоалар билан музокаралар олиб бормоқда. Сўнгги миш-мишларга кўра, Сафоновни Испания ёки Португалияга ижара асосида юбориш эҳтимоли бор.
"Спортинг" буни рад этса-да, "Валенсия" ва "Брага" каби жамоалар Сафонов учун мантиқий вариант бўлиши мумкин. Собиқ футболчи Александр Мостовой ҳам ўз фикрини билдирди: "Агар мукофотлар хоҳласанг, қол; агар майдонда ўйнашни хоҳласанг, бошқа жамоа қидир." Сафонов эса Россияга қайтишни режалаштирмаётгани ҳақида очиқ гапирган.
У мураккабликларни енгиш учун Европага келган ва ҳали ортга қайтишни истамайди. Бу тўғри қарор, аммо фақат машғулотлар ўйин тажрибасини бера олмайди.
Сафонов аллақачон бир қатор совринларни қўлга киритган. У майдонда рақобатни йўқотгани йўқ, аксинча, лойиҳа мафкурасига мос тушмаяпти. Бу эса бошқа масала. Мафкуравий қарорларни фақат трансферлар орқали ўзгартириш мумкин.
Шунинг учун тўғри йўл – қишки трансфер ойнасида янги жамоага ўтиш. Ижара асосида бошқа лигага ўтиш вақти келди.
Парижда Сафонов Европа чемпионлари таркибида бўлишини исботлади. Энди у яна биринчи рақамли дарвозабон эканлигини исботлаш вақти келди.
Ҳар бир дарвозабон ўзига савол бериши керак: 26 ёшда майдонда ўйнаш муҳимми ёки орзулар клубининг захирасида ўтириш?
