Интер Майами клуби ҳужумчиси Лионел Месси катта интервью берди ва унда 2026 йилги жаҳон чемпионати чемпионлик унвонини ҳимоя қилишни хоҳлаётганини маълум қилди. Бироқ, аргентиналик футболчи ушбу мусобақада қатнашиш имконияти ҳақида эҳтиёткор фикр билдирди.
Месси NBC билан суҳбатда, янги мавсум олдидан Интер Майами билан машғулотларни бошлаганидан сўнг ўз ҳолатини баҳолаб, мусобақага тўлиқ тайёр эканлигини аниқлашини айтди. "Очиғини айтсам, жаҳон чемпионатида қатнашиш ажойиб бўларди.
Мен яхши формада бўлишни ва Аргентина терма жамоасида муҳим роль ўйнашни истайман. Кейинги йил мавсумолди машғулотларимни бошлаганимда вазиятни баҳолайман ва юз фоиз тайёр бўла оламанми, кўрамиз", деди Месси.
Месси ўз қарорини фақат ўз кучига тўлиқ ишонч ҳосил қилганидан сўнг қабул қилишини таъкидлади. Агар у жамоага ёрдам бера олмаслигини ҳис қилса, Аргентина жаҳон чемпионатига ўз юлдузисиз боради.
Бироқ у жаҳон чемпионлиги унвонини ҳимоя қилиш имкониятини ажойиб деб атади. "Албатта, мен ҳаяжондаман, чунки бу жаҳон чемпионати.
Биз уни ўтган сафар ютган эдик. Унвонни ҳимоя қилиш жуда ажойиб бўларди.
Терма жамоада, айниқса катта мусобақаларда ўйнаш ҳар бир футболчининг орзуси", дея хулоса қилди Месси. Эслатиб ўтамиз, 2022 йил декабр ойида Месси Аргентина терма жамоаси таркибида илк бор жаҳон чемпиони бўлди ва бу муваффақият финалда Францияни мағлуб этиш орқали қайд этилди.
Ушбу мусобақада Лионел Скалони шогирдлари Саудия Арабистонига кутилмаган тарзда ютқазиб, кейинги барча ўйинларда ғалаба қозонишган эди. Шундан сўнг Месси Европани тарк этиб, АҚШнинг Интер Майами клубига қўшилди.
Футболчи ўзи учун қулайроқ муҳитни танлагани ва ҳаддан ташқари эътибордан чарчаганини тан олди. Муттахассисларнинг фикрича, Месси 2026 йилги жаҳон чемпионатида қатнашиши эҳтимоли юқори.
Унинг ўзи бу борада қарорини эълон қилмаса-да, иккинчи бор жаҳон чемпиони бўлиш Мессини футбол тарихининг энг буюк ўйинчиларидан бири сифатида мавқеини янада мустаҳкамлайди. Агар соғлиги яхши бўлса, биз уни сайёранинг энг кутилган мусобақасида яна уч ўйинда кўришимиз мумкин.
Аргентина терма жамоасининг чемпионликни ҳимоя қилиш имконияти жуда юқори. Жамоа 2022 йилги версиядан деярли кучсизланмаган, фақат Месси бироз қариган.
Аргентина Жанубий Америкада ҳукмронликни давом эттириб, сўнгги икки қитъа кубогини қўлга киритди. Жамоада ёш ва тажрибанинг мукаммал уйғунлиги мавжуд, шунингдек, бош мураббий билан ажойиб мувофиқлик терма жамоа ичидаги муҳитга ва майдондаги натижаларга ижобий таъсир кўрсатмоқда.
Аргентина терма жамоасининг асосий рақобатчилари Франция ва Испания бўлиши мумкин, эҳтимол Англия ва Бразилия ҳам уларга қўшилади. Испания охирги Европани ютган бўлса-да, қуръа натижалари қандай бўлишини олдиндан айтиб бўлмайди.
Март ойида Аргентина ва Испания ўртасидаги "Финалиссимо" баҳсида эса Аргентина жамоасининг ҳақиқий амбициялари аниқ бўлади.
