Қатарда ўтаётган U-17 жаҳон чемпионатининг 2-турида Ислом Исмоилов бошчилигидаги Ўзбекистон ўсмирлар терма жамоаси Ирландия ёшларига қарши баҳс олиб борди. Биринчи турда Парагвай устидан ишончли ғалаба қозонган жамоамиз бу сафар ҳам яхши бошлади, аммо ҳисобни сақлаб қололмади.
Ўйиннинг 20-дақиқасида жамоамиз сафидаги Аббосбек Шукруллаев чиройли зарба орқали ҳисобни очди ва ўз жамоасини олдинга олиб чиқди. Аммо ирландияликлар тезда ўзини қўлга олди. 33-дақиқада Греди Макдонелл жарима майдони ичидан аниқ зарба билан ҳисобни тенглаштирди.
Иккинчи бўлимда кураш янада шиддатли тус олди. Ўзбекистон ўсмирлари бир неча бор хавфли ҳужумлар уюштирди, аммо гол уришнинг иложи бўлмади. 75-дақиқада эса Микаел Нунан жарима майдони яқинидан аниқ зарба билан жамоасига ғалаба келтирди.
Беллашув шундай натижа билан якунланди — Ирландия 2:1 ҳисобида ғалаба қозонди.
Ирландия — Ўзбекистон 2:1
Голлар: Аббосбек Шукруллаев (19) — Греди Макдонелл (32), Микаел Нунан (75).
Ўзбекистон таркиби: Рустамжонов, Ҳакимов, Баҳодирхонов, Ҳасанов (74. Саидов), Ҳабибуллаев (74. Рустамов), Содиқов, Анваров, Мусахонов, Абдумўминов (61. Алиев), Шукруллаев, Эримбетов (84. Мурадов).
Ирландия таркиби: Нунан, Батлер, Финнеран, Ковалескис (46. Ожианвуна), Леонард, Мартос, Макдонаг, Макдонелл (54. Браун), Нунан М., Соланке, Уме.
Бу ғалабадан сўнг Ирландия 100 фоизли натижа билан гуруҳда пешқадамликни сақлаб қолди. Ўзбекистон ва Парагвай терма жамоалари эса 3 тадан очко билан кейинги поғоналарни эгаллаб турибди.
Ўзбекистон ўсмирлар терма жамоаси учун бу мағлубият оғир бўлди, аммо имкониятлар ҳали тугагани йўқ. Гуруҳ босқичининг ҳал қилувчи, сўнгги баҳси 11 ноябр куни Панамага қарши бўлиб ўтади. Бу учрашув жамоамиз тақдирини белгилайдиган ҳал қилувчи синов бўлади.
Ёш футболчиларимиз ғалабага интилгани ва сўнгги дақиқаларгача курашни тўхтатмагани эса мухлислар учун алоҳида ифтихор бағишлади.
“Zamin”ни Telegram'да ўқинг!
