Жаҳон чемпионати “J” гуруҳидан ўрин олган иккинчи баҳсда Ирландия ўсмирларига қарши курашда мағлубиятга учраган Ўзбекистон U-17 терма жамоаси сардори Мўминхон Баходирхонов ўйиндан сўнг журналистлар билан суҳбатда бўлди. У беллашувдаги хатолар, жамоа ҳаракатлари ва рақиб ҳақидаги фикрларини очиқ баён этди.
Баходирхоновнинг сўзларига кўра, жамоа майдонга фақат ғалаба учун тушган, бироқ ҳимоядаги айрим нохуш хатолар натижани белгилаб берган.
“Биз ўйинга ғалаба мақсадида кирдик, ўз услубимизга таяниб ҳаракат қилдик. Аммо ҳимоядаги бир нечта хатолар бизга қимматга тушди. Ирландия жамоасининг иккинчи қаватда яхши ўйнай олишини олдиндан билардик, лекин айрим вазиятларда ҳимоячиларимиз бир-бири билан тўлиқ мулоқот қилмагани сабабли тўпни ўтказиб юбордик. Бу биз учун катта сабоқ бўлди. Ҳали ёшмиз, бундай ўйинлар келажакдаги тажрибамизни оширади,” — деди у.
Сардор жамоа руҳияти ва ҳаракатини ижобий баҳолади. Унинг фикрича, футболчилар майдонда бор кучини ишга солган, бироқ баъзи пассивлик ҳолатлари ғалабага тўсқинлик қилган.
“Бизнинг жамоа аслида яхши ҳаракат қилди. Ҳимояда ҳам, ҳужумда ҳам имкониятлар яратдик. Бироқ баъзи вақтларда ўйиндаги танаффуслар, кутилмаган паузалар ритмни бузди. Бу бизга таъсир қилди. Шундай бўлса ҳам, йигитлар бор кучини берди, майдонда жанг қилди,” — дея таъкидлади Баходирхонов.
Сардорнинг таъкидлашича, ўйин давомида у жамоадоши Мусахоновнинг вазифаларини ҳам бажаришга мажбур бўлган.
“Ҳар бир ўйин олдидан мураббийлар рақиб ҳақида тўлиқ маълумот беришади. Ирландиянинг 9 ва 11-рақамли ўйинчилари фаол эканини билардик. Шу сабаб уларни назорат қилишга катта эътибор қаратдик. Мусахонов бугун жуда яхши ўйнади, рақибга деярли имконият қолдирмади. Мен эса у кўпроқ олдинга чиққанда унинг орқасини ёпишга ҳаракат қилдим,” — деди у.
Баходирхонов биринчи голдан сўнг жамоа бироз бўшашиб қолганини ҳам тан олди, аммо бу Ирландиянинг кучлилиги эмас, балки ёшлик эҳтиётсизлиги натижаси бўлганини қайд этди.
“Гол урганимиздан сўнг ўз ўйинимизда шошма-шошарлик бошланди. Бу ёшликнинг белгиси. Ҳар бир жамоа голдан кейин руҳланади, биз ҳам иккинчи голни уришни хоҳладик, аммо айрим вазиятларда шошдик. Бундан Ирландия яхши фойдаланди. Улар тўпни кўпроқ назорат қилди, аммо ҳаққоний жиҳатдан айтиш керак — улар биздан кучли эмасди, фақат хатоларимиздан унумли фойдаланди,” — дея қўшимча қилди сардор.
Баходирхонов суҳбат якунида мураббийлар штаби томонидан ҳар бир рақиб учун пухта тайёргарлик кўрилаётганини, жамоа эса бундай мусобақалар орқали фақат ўсишни мақсад қилганини таъкидлади.
“Мураббийларимиз ҳар бир баҳс олдидан рақибни чуқур ўрганишади ва керакли кўрсатмаларни беришади. Биз эса уларни майдонда тўлиқ бажаришга ҳаракат қиламиз. Бу мағлубият биз учун дарс бўлади. Олдинда яна ўйинлар бор, Ирландия билан яна дуч келишимиз мумкин. Ўшанда бундан яхшироқ натижа кўрсатамиз,” — деди Мўминхон Баходирхонов ишонч билан.
Ўзбекистон ўсмирлар термаси энди гуруҳ босқичидаги ҳал қилувчи баҳсни Панамага қарши ўтказади. Жамоа ғалаба қозонса, плей-офф йўлланмасига яқинлашади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
