33 ёшли тажрибали ҳужумчи Сон Ҳён Мин атрофида охирги ҳафталарда тарқалган миш-мишлар мухлисларни бироз ҳаяжонлантирганди. Айниқса, унинг январ ойида МЛСдаги мавсум якунлангач «Лос-Анжелес»ни қисқа муддатга тарк этиб, Европага ёки Осиёга қайтиши мумкинлиги ҳақидаги хабарлар кенг муҳокама қилинди.
Бироқ кореялик юлдуз барча саволларга нуқта қўйди — у ўз клубини тарк этиш нияти йўқлигини очиқ айтиб, жамоасига бўлган садоқатини яна бир бор намоён қилди. Унинг таъкидлашича, барча фикру эътибори aйнан "Лос-Анжелес"даги фаолиятига қаратилган ва у бу ерда қурилаётган янги, рақобатбардош жамоанинг муҳим қисми бўлиб қолишни хоҳлайди.
Соннинг қолиши клуб режаларига ҳам мос тушади. «Лос-Анжелес» келаси мавсумда кучли таркиб шакллантиришни мақсад қилган, шу боис етакчи футболчининг жамоада қолиши стратегиянинг асосий бўғинига айланган.
Унинг ўтган мавсумдаги кўрсаткичлари ҳам бунга муносиб асос: 12 та ўйин, 10 та гол ва 4 та голли узатма — бу даража нафақат МЛС, балки Европада ҳам юқори баҳоланадиган статистика.
Айтиш жоизки, аввалроқ «Барселона»нинг Сонни қисқа муддатга ижарага олиш истаги ҳақида хабарлар чиққанди. Аммо ўша миш-мишлар энди расман инкор қилинди — Соннинг ўзи ҳам, клуб раҳбарияти ҳам ундан кетишни кутмаётганини билдирди.
Шу тариқа, кореялик юлдуз келаси мавсумда ҳам «Лос-Анжелес» сафида бўлиб, янги спорт мақсадларига йўналиш олган ҳолда ишини давом эттиради. Мухлислар эса ундан яна кўпроқ голлар, янада ёрқин ўйин ва янги рекордлар кутмоқда.
“Zamin”ни Telegram'да ўқинг!
