“Манчестер Сити”да ўтган мураккаб ва босимли мавсумлардан сўнг “Эвертон”га кўчиб ўтиши билан ўз ўйинини қайта топган Жек Грилиш Англия Премьер-лигасида техник жиҳатдан энг кучли футболчи ким экани ҳақида фикр билдирди. Унинг бу борадаги танлови кўпчиликни ҳайратга солиши мумкин.
Англиялик ярим ҳимоячи ўз жамоадоши — сенегаллик Илимана Ндиайенинг индивидуал маҳоратини алоҳида эътироф этди. Грилишнинг таъкидлашича, агар соф техника, яъни тўп билан ишлаш, майдонда эркин ҳаракатланиш ва рақибни алдаш қобилияти ҳақида сўз борса, Ндиайе Премьер-лигада тенгсиз.
— Ндиайе — лигадаги техникаси энг юқори даражада бўлган футболчи. Агар гап айнан соф маҳорат ҳақида кетса, мен учун бу масалада шубҳа йўқ, — деди Грилиш Goal нашрига берган интервьюсида.
Шу билан бирга, у “Арсенал”нинг етакчиларидан бири Букайо Сака ҳақида ҳам фикр билдириб ўтди. Грилишнинг айтишича, Сака жуда юқори даражадаги ижрочи, дунё миқёсидаги энг кучли вингерлардан бири ҳисобланади. Бироқ, унинг ўйини кўпроқ самарадорлик ва ҳаракатга қурилган бўлиб, техника борасида Ндиайедан ортда қолади.
Жорий мавсумда Илимана Ндиайе барча мусобақаларда 18 та учрашувда иштирок этиб, 4 та гол уриш ва 2 та голли узатма беришга муваффақ бўлди. Унинг майдондаги эркинлиги, тўпни назорат қилишдаги ишончли ҳаракатлари ва кутилмаган финтлари “Эвертон” ўйинига янги ранг қўшмоқда.
Грилишнинг бу баёноти Премьер-лигада техника ва самарадорлик ўртасидаги фарқ ҳақида яна бир бор муҳокамаларни кучайтирди. Айтиш мумкинки, Ндиайе нафақат жамоаси, балки бутун лига учун ҳам тобора қизиқарли ва хавфли футболчига айланиб бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
