Сафонов жароҳат туфайли ПСЖда яна захирага қайтиши мумкин

Матвей Сафонов футбол тарихига кириб қолди: у Қитъалараро кубок финалида кетма-кет тўртта пеналтини қайтарди. Кейинроқ маълум бўлдики, дарвозабон буни чап қўли синган ҳолда амалга оширган.

Бироқ айнан шу жароҳат уни камида бир ойга сафдан чиқарди ва ПСЖдаги асосий таркибдаги ўрни яна савол остида қолди. 17 декабр куни Сафонов “Фламенго”га қарши пеналтилар сериясида парижликларни ғалабага олиб чиқди.

У ФИФА мусобақалари тарихида кетма-кет тўртта пеналтини қайтарган илк дарвозабонга айланди ҳамда ўйиннинг энг яхши футболчиси совринини олди. Байрам пайтида у оғриқ аломатларини сездирмади: жамоадошлари уни ҳавога ирғитди, у кубокни икки қўли билан кўтарди ва камералар қаршисида жилмайди.

19 декабрда эса ПСЖ Сафоновнинг чап қўл панжасида синиш борлигини ва у камида уч ҳафта ўйнай олмаслигини маълум қилди. Бош мураббий Луис Энрике вазиятни шундай изоҳлади: футболчининг ўзи ҳам жароҳат қачон ва қандай юз берганини аниқ тушунмаяпти.

Мураббийлар штаби синиш учинчи пеналти эпизодида, Сафонов ғалати ҳаракат қилган пайтда содир бўлган бўлиши мумкин, деган тахминни илгари сурди. Шу тариқа, Матвей камида сўнгги икки зарбани жароҳат билан қайтаргани эҳтимоли бор.

Бу адреналин, характер ёки ижтимоий тармоқларда ҳазиллашилаётганидек, оғриқни сезмаслик эмас, аммо эпизод барибир ҳайратланарли. Мутахассислар турли тахминларни айтмоқда.

Спорт шифокори Никита Карлицкий дарвозабонлар орасида тез-тез учрайдиган бармоқ синиши бўлиши мумкинлигини қайд этади: кўпчилик бундай ҳолатларда ҳам ўйинни давом эттиради, бармоқлар эса кўп миқдорда тейп билан мустаҳкамланади. Спорт тиббиёти миллий маркази бош шифокори Михаил Бутовский эса эҳтиёткорона ёндашиб, айнан қайси суяк шикастлангани ва ПСЖ шифокорлари қайси даволаш усулини танлашини билмасдан туриб хулоса қилиш қийинлигини таъкидлайди.

Сафоновнинг жасорати эътироф этилса-да, энди бу фидойилик унинг асосий таркибдаги мақомига таъсир қилиши ҳам мумкин. Франциядаги фаолияти давомида у кўп вақтини захирада ўтказди: аввал Жанлуижи Доннарумма, кейин Люк Шевалье ортидан имконият кутди.

Шевалье тўпиқдан жароҳат олгач, Сафонов ниҳоят соядан чиқди ва гўё асосий дарвозабонликни мустаҳкамлагандек кўринганди. Энди эса синиш сабаб вазият яна ўзгарди.

Шевалье иккинчи имкониятни олмоқда ва айни пайтда масъулият ҳам ниҳоятда юқори. 4 январ куни ПСЖ Лига 1 доирасида XXI асрдаги илк Париж дербисида “Париж” клубига қарши майдонга тушади.

8 январ куни эса Франция Суперкубоги финалида “Марсель”га қарши ўйин бор. Бундай учрашувларда хатолар кечирилмайди: дарвозабон барқарорлигини исботласа, посбонлар иерархияси масаласи яна қайта очилиши мумкин.

Шевальенинг бу мавсумдаги кўрсаткичлари ўртача: 20 ўйинда 22 гол ўтказиб юборган, 8 учрашувда дарвозаси дахлсиз қолган, зарбаларни қайтариш фоизи 70 фоиздан паст. Унинг “Тоттенҳэм”га қарши УЕФА Суперкубогидаги дебюти ҳам баҳсли баҳоланган: пеналтилар сериясида қаҳрамонлик кўрсатган, бироқ асосий вақтда ишончсиз эпизодлари бўлган.

Савол шундаки, Шевалье ҳозирги босимга дош бера оладими? Ахир унинг ортида Қатардagi финалда афсонавий ўйин кўрсатган Сафоновнинг нуфузи турибди.

Сафонов эса вазиятга фалсафий қарамоқда. У телеграм каналида шундай ёзди: “Ишлашда давом этамиз ва олдинга юрамиз, бу ерда тўхтаб бўлмайди.

Биласиз: нима бўлишидан қатъи назар, мени синдириб бўлмайди”. Луис Энрике ҳам тезроқ тикланишига ишонади: Сафоновнинг менталитети ва характери кучли, шу боис у одатдагидан тезроқ сафга қайтиши мумкин.

Ҳатто Шевалье асосий таркибда мустаҳкамланиб қолса ҳам, Сафонов учун ҳаммаси ёмон эмас. Қитъалараро кубок финалидаги ўйин унинг Европа бозоридаги нуфузини кескин оширди.

Энди у топ-клублар раҳбарияти диққат марказида. Масалан, “Манчестер Юнайтед” Давид де Хеа кетганидан бери барқарор биринчи рақамни топа олмаяпти.

Финал тақдирини ҳал қила оладиган, пеналтилар сериясида рақибга психологик босим ўтказа оладиган дарвозабон эса камёб. Бошқа масала: ПСЖ бундай футболчини қўйиб юборадими?

Сафоновнинг шартномаси 2027 йилгача амал қилади. Бир нечта соврин учун курашадиган клубда икки кучли дарвозабонга эга бўлиш мантиқан тўғри.

Аммо бу Сафоновни қониқтирадими? У аллақачон захира ўриндиғидан кўра каттароқ ролга лойиқ эканини исботлаб бўлди.

Ҳозир эса россиялик дарвозабонга тикланиш учун вақт керак. Бу орада Шевалье йўқотилган позицияларни қайтаришга уринади.

Айнан шу давр ҳаммасини ўзгартириши мумкин. Ёки ҳеч нарсани ўзгартирмаслиги ҳам эҳтимол: Сафонов Қатарда кўрсатган ўйиндан кейин уни унутишнинг ўзи қийин.

Собиқ дарвозабон Анзор Кавазашвили вазиятни ачиниш билан баҳолади: Сафонов бир ярим йил навбат кутди, ёрқин ўйнади, кейин эса кутилмаганда шундай бахтсизлик юз берди. Ҳаqiqатан ҳам аламли.

Бироқ Сафонов аллақачон асосий ҳақиқатни кўрсатди: россиялик спортчиларни синдириш осон эмас, ҳатто синиш жароҳатлари билан ҳам. “Zamin”ни Telegram'да ўқинг!