Испания миллий жамоаси ҳамда Атлетик Билбао ҳужумкор яримҳимоячиси Нико Уилямс келаси мавсумдан бошлаб фаолиятида жиддий бурилиш қилиш ниятида. Испания матбуоти тарқатаётган маълумотларга кўра, 23 ёшли футболчи ёзги трансфер ойнасида Реал Мадрид сафига ўтишни асосий мақсад қилиб олган.
Хусусан, Fichajes нашри ёзишича, Уилямс учун Мадрид варианти ҳозир энг устувор ҳисобланади. Аввалроқ уни Барселона билан боғлаган турли миш-мишлар пайдо бўлган эди, аммо ҳозирда бу йўналиш деярли ёпилган. Сабаб оддий: каталонияликлар футболчининг трансфер қийматини тўлиқ қоплаш имкониятига эга эмас.
Transfermarkt портали Нико Уилямснинг бозор баҳосини 60 миллион евро атрофида белгилаган. Молиявий жиҳатдан қийналаётган «Барселона» учун бундай сумма ҳозирча оғирлик қилаётгани айтилади. Шу боис, футболчининг ўзи ҳам реалроқ ва барқарор вариант сифатида Мадрид клубини кўриб чиқмоқда.
Нико Уилямс 2021 йил ёзидан бери «Атлетик Билбао» сафида тўп суриб келмоқда. У қисқа вақт ичида жамоанинг асосий фигураларидан бирига айланиб, тезлиги, дриблинги ва ҳужумдаги фаоллиги билан мухлислар эътиборини қозонди. Қизиғи шундаки, футболчининг клуб билан амалдаги шартномаси жуда узоқ муддатга — 2035 йил ёзигача тузилган.
Шунга қарамай, ёш футболчи каттароқ саҳнага чиқиш, совринлар учун мунтазам курашиш ва Европанинг энг юқори даражасида ўзини синаб кўришни истамоқда. Мадриднинг «Реал» клуби эса айнан шундай имкониятларни таклиф қила оладиган манзил сифатида қаралмоқда.
Ёзги трансферлар ойнаси яқинлашар экан, Нико Уилямс атрофидаги воқеалар янада қизиқ тус олиши аниқ. Мухлислар эса унинг ҳақиқий танлови расман эълон қилинишига интиқлик билан кутмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
