Мадриднинг «Реал» клубида мураббийлар штаби атрофида ноаниқлик кучайиб бормоқда ва жамоа раҳбарияти янги бош мураббий вариантларини кўриб чиқишга киришган. Бу ҳақда L’Équipe нашри хабар бермоқда.
Манбаларга кўра, жамоанинг ҳозирги устози Альваро Арбелоа атрофидаги вазият барқарор эмас. Бунга асосий сабаб сифатида «Реал»нинг сўнгги натижалардаги тушкунликлари, жумладан Чемпионлар Лигасидан чиқиб кетиши ва Испания чемпионатида чемпионлик пойгасида орқада қолиши кўрсатилмоқда.
Шу боис клуб раҳбарияти мураббийлар корпусида эҳтимолий ўзгаришларни жиддий муҳокама қилмоқда. Агар қарор амалга оширилса, «Реал» учун асосий номзодлар сифатида бир нечта машҳур мутахассислар кўриб чиқилмоқда.
Шулар қаторида Италиянинг «Милан» клубини бошқараётган Массимилиано Аллегри ҳамда ҳозирда АҚШ терма жамоаси устози сифатида фаолият юритаётган Маурисио Почеттино номлари алоҳида қайд этилмоқда.
Шунингдек, аввалроқ Мадрид клуби Франция терма жамоасини 2026 йилги жаҳон чемпионатидан сўнг тарк этиши кутилган Дидье Дешам номзодини ҳам муҳокама қилгани айтилган эди. Бу эса «Реал»нинг янги давр учун кенг қамровли режа тузаётганини кўрсатади.
Қисқаси, «Реал» муҳим қарорлар остонаси турибди. Клуб келажаги ва натижалар барқарорлиги айнан янги мураббий танловига боғлиқ бўлиб қолмоқда. Мухлислар эса Мадридда қандай ўзгаришлар юз беришини интиқлик билан кузатмоқда.
“Zamin”ни Telegram'да ўқинг!
