«Брентфорд»дан 55 миллион фунт стерлинг эвазига «Нюкасл»га ўтган Йоан Висса жамоанинг афсонавий 9-рақамли либосини танлаб, ўзига хос жасорат кўрсатди. Бироқ ҳужумчининг «Сент-Жеймс Парк»даги дебют мавсуми кутилганидек кечмади. Бу ҳақда Goal.com хабар беради.
Жароҳатлар ва спорт формасини йўқотиши унинг самарадорлигига жиддий таъсир кўрсатди.
Конго Демократик Республикаси терма жамоаси сафида сентябрь ойида олган тиззасидаги жароҳати Виссани уч ойга сафдан чиқарди. У «Нюкасл» сафидаги дебютини фақат 6 декабрь куни ўтказди.
Ҳозирга қадар 24 та ўйинда майдонга тушган ҳужумчи бор-йўғи 3 та гол уришга муваффақ бўлди, улардан фақат биттаси Премьер-лига ҳисобига ёзилган.
Виссанинг собиқ жамоадоши Пол-Жозе Мпоку футболчининг имкониятларига ишонишини билдирди. Унинг сўзларига кўра, «Нюкасл» уни бежизга сотиб олмаган ва ҳужумчи ўз сифатларини кўрсатиш учун мослашиш даврини ўташи керак.
Мпоку жароҳатлар адаптация жараёнини қийинлаштирганини, аммо Висса тез орада ўз қийматини исботлашини таъкидлади.
Алан Ширер каби афсоналар кийган 9-рақамли либосни танлаш борасидаги саволга Мпоку нейтрал жавоб берди. Унинг фикрича, Ширер барибир афсона бўлиб қолади ва ҳар қандай янги ҳужумчи бу босимдан қўрқмаслиги лозим.
Висса «Брентфорд»да 11-рақамда ўйнаган бўлса-да, янги клубида масъулиятни ўз зиммасига олишга қарор қилган.
Ҳозирда Эдди Хау жамоаси мавсум якунига тайёргарлик кўрмоқда. Виссада ўзини кўрсатиш учун чемпионат якунигача тўртта ўйин қолган.
Навбатдаги баҳс шанба куни «Брайтон»га қарши бўлиб ўтади. Футболчи тўрт йиллик шартнома имзолаганини ҳисобга олсак, унинг келажаги кейинги ўйинлардаги ҳаракатларига боғлиқ бўлади.
“Zamin”ни Telegram'да ўқинг!
