Родри жароҳат сабабли "Ман Сити"нинг "Бернли"га қарши ўйинини ўтказиб юборади
"Ман Сити" ярим ҳимоячиси Родри жароҳат сабабли "Бернли"га қарши ўйинини ўтказиб юборади. У "Арсенал"га қарши ўйинда жароҳат олган ва шифокорлар унинг қайтиши муддати аниқ эмаслигини маълум қилган. Мураббий Хосеп Гвардиола Родрининг йўқлигида Нико Гонсалеснинг ўйинда иштирок этишини кутмоқда. Шунингдек, Рубен Диас ҳам жараҳатланган ва "Бернли" билан ўйинда иштирок этмайди.
"Ман Сити" ярим ҳимоячиси Родри чов қисмидаги жароҳат сабабли Премьер-лиганинг навбатдаги турида "Бернли"га қарши майдонга туша олмайди. 2024 йилги "Олтин тўп" соҳиби "Арсенал" устидан қозонилган ғалабали ўйинда оқсоқланган ҳолда майдонни тарк этган эди. Бу ҳақда Goal.com хабар беради.
Хосеп Гвардиола испаниялик футболчининг сафга қайтиш муддати ҳозирча аниқ эмаслигини тасдиқлади. Шифокорлар текшируви Родри нафақат "Бернли", балки Англия кубоги ярим финали доирасидаги "Саутгемптон" билан баҳсни ҳам ўтказиб юбориши мумкинлигини кўрсатмоқда.
"Ўйлайманки, у эртанги ўйинга тайёр эмас. Кейинги баҳсларда, хусусан, "Саутгемптон" ёки 12 кундан кейин "Эвертон"га қарши ўйинда унинг ҳолатига қараб қарор қабул қиламиз", — деди Гвардиола матбуот анжуманида.
Родри йўқлигида таянч ярим ҳимояси вазифасини Нико Гонсалес бажариши кутилмоқда. Мураббий Гонсалеснинг имкониятларини юқори баҳолаб, у аввал ҳам жамоага қийин вазиятларда ёрдам берганини таъкидлаб ўтди.
"Ман Сити" таркибида ҳимоя чизиғида ҳам муаммолар мавжуд. Рубен Диас тўпиғидан олган жароҳати сабабли тикланишни давом эттирмоқда ва "Бернли" билан ўйинда иштирок этмайди.
Изоҳлар 0
…