Англия Премьер-лигаси доирасида ўтказилган Мерсисайд дербисида «Ливерпуль» жамоаси «Эвертон» устидан 2:1 ҳисобида қийин ғалабага эришди. «Хилл Диккинсон» стадионида кечган баҳсда Виржил ван Дейкнинг сўнгги дақиқаларда урган голи меҳмонларга уч очко тақдим этди. Бу ҳақда Goal.com хабар беради.
Учрашувнинг биринчи бўлимида Муҳаммад Салоҳ ҳисобни очиб, «Ливерпуль»ни олдинга олиб чиқди. Бироқ иккинчи бўлимда «Эвертон» ҳужумчиси Бето мувозанатни тиклашга муваффақ бўлди.
Ўйин дуранг билан якунланадигандек кўринган бир пайтда, ҳакам томонидан қўшиб берилган вақтда Ван Дейк бурчакдан узатилган тўпни боши билан дарвозага жойлаб қўйди.
Ушбу ғалаба эвазига Арне Слот шогирдлари турнир жадвалида кучли бешлик учун курашда рақибларидан етти очкога ўзиб кетишди. Ўйин давомида «Ливерпуль» дарвозабони Гиорги Мамардашвили бир нечта хавфли вазиятларда жамоасини қутқарди, аммо жароҳат сабабли майдонни муддатидан олдин тарк этишга мажбур бўлди.
«Ливерпуль» таркибида Коди Гакпо ва Муҳаммад Салоҳ фаол ўйин кўрсатган бўлса, ҳимояда Ван Дейк ҳақиқий етакчи сифатида намоён бўлди. «Эвертон» эса мағлубиятга қарамай, учрашувнинг катта қисмида муносиб қаршилик кўрсатди ва бир неча бор гол уришга яқин келди.
“Zamin”ни Telegram'да ўқинг!
