Бавария бош мураббийи Винсент Компани Чемпионлар лигаси ярим финалида PSJга қарши кечган баҳсдан сўнг ҳакамлар қарорини кескин танқид қилди. Мюнхенликлар икки ўйин натижасига кўра 6:5 ҳисобида мағлубиятга учраб, мусобақани тарк этишди. Учрашув давомида юзага келган баҳсли вазиятлар, хусусан, пеналти белгиланмагани немис клуби вакилларининг ғазабига сабаб бўлди. Бу ҳақда Goal.com хабар беради.
Ўйиннинг энг муҳим паллаларидан бирида Витинҳанинг тўпни узоқлаштиришга уриниши жамоадоши Жоао Невеснинг қўлига тегди. Ҳакам Жоао Пинҳеиро қоидаларга кўра, тўп яқин масофадан жамоадошидан келиб теккан тақдирда пеналти белгиланмаслигини асос қилиб олди. Компани эса бу қарорни мантиқсиз деб атаб, ҳакамлар жамоасининг умумий ёндашувидан норозилигини яширмади.
Шунингдек, PSJ ҳимоячиси Нуно Мендеснинг жарима майдончаси яқинида тўпни қўли билан тўхтатиб қолгани ҳам катта баҳсларга сабаб бўлди. Иккинчи сариқ карточка олиши керак бўлган футболчини ҳакам майдондан четлатмади. Компанининг фикрича, ҳакам ўйин тақдирига таъсир қилувчи бу каби муҳим қарорларни қабул қилишда иккиланиб қолган.
Бавария учрашувнинг дастлабки дақиқаларидаёқ Усман Дембеле томонидан киритилган голдан сўнг ҳисобда ортда қолган эди. Шунга қарамай, жамоа охиригача курашди, бироқ ҳакамлик қарорлари якуний натижага ўз таъсирини ўтказди. Компани ўз шогирдларининг меҳнатини юқори баҳолаб, икки ўйин давомида Бавария дарвозасига нисбатан адолатсизликлар кўп бўлганини таъкидлади.
“Zamin”ни Telegram'да ўқинг!
