Мадриднинг “Реал” клуби ёзги трансферлар олдидан яна бир ёш ва иқтидорли футболчини диққат марказига олди. Испания грандлари ҳозирда Туриннинг “Ювентус” жамоасида порлаётган туркиялик футболчи Кенан Йилдиз трансфери бўйича имкониятларни ўрганмоқда.
Италиянинг нуфузли Gazzetta dello Sport нашри маълумотига кўра, “қаймоқранглилар” 21 ёшли ҳужумкор футболчини ёзги трансфер ойнаси учун асосий мақсадлардан бири сифатида кўрмоқда.
Маълум қилинишича, “Реал” президенти Флорентино Перес клубнинг бу мавсумдаги айрим омадсиз натижаларидан кейин таркибни янада кучайтиришга қарор қилган.
Айниқса, Ла Лига ва Чемпионлар лигасида кутилган натижалар қайд этилмагани мадридликлар раҳбариятини янги ва иқтидорли футболчиларни излашга ундаган.
Кенан Йилдиз эса ҳозир Европадаги энг истиқболли ёш футболчилардан бири сифатида баҳоланмоқда. Туркиялик футболчи техникаси, тезкорлиги, майдонни яхши кўра билиши ва ҳужумдаги креатив ҳаракатлари билан мутахассислар эътиборини тортиб келмоқда.
Аввалроқ Англиянинг “Челси” клуби ҳам Йилдизга жиддий қизиқиш билдиргани ҳақида хабарлар тарқалган эди.
Бироқ 2026 йил февраль ойида футболчи “Ювентус” билан шартномасини 2030 йил ёзигача узайтирди. Бу эса туринликлар уни жамоанинг келажак лойиҳасида муҳим фигура сифатида кўраётганини англатади.
Шунга қарамай, “Реал” футболчи атрофидаги вазиятни диққат билан кузатишда давом этмоқда. Испания клуби келажак учун кучли ва ёш таркиб шакллантиришни асосий вазифалардан бири сифатида белгилаган.
Кенан Йилдиз 2022 йилдан буён “Ювентус” шарафини ҳимоя қилиб келмоқда. У Италия клубига Германиянинг “Бавария” академиясидан келиб қўшилган эди.
Қисқа вақт ичида туркиялик иқтидор эгаси нафақат “Ювентус” мухлислари, балки бутун Европа футболи мутахассислари диққатини ўзига жалб қилишга муваффақ бўлди.
Кузатувчилар фикрича, агар Йилдиз шу суръатда ўсишда давом этса, яқин йилларда у Европа футболидаги энг қиммат ва талаб юқори бўлган футболчилардан бирига айланиши мумкин.
“Zamin”ни Telegram'да ўқинг!
