PSJ бош мураббийи Луис Энриқуе Чемпионлар лигаси ярим финалида Баварияга қарши кечган жавоб учрашувида дарвозабон Матвей Сафонов қўллаган ғайритабиий тактика ҳақидаги саволларга жавоб беришдан бош тортди. Парижликлар умумий 6:5 ҳисобида ғалаба қозониб, финал йўлланмасини қўлга киритган бўлса-да, дарвозабоннинг тўпни атайлаб майдон ташқарисига тепиши кўпчиликда савол уйғотди. Бу ҳақда Goal.com хабар беради.
Таҳлилларга кўра, бу шунчаки хато эмас, балки Винсент Компани шогирдларининг ҳужумга ўтишини тўхтатиш учун ишлаб чиқилган махсус режа бўлган. Сафонов тўпни ён чизиқдан ташқарига чиқариб юбориш орқали Бавария футболчиларига тезкор қарши ҳужум уюштириш имконини бермади ва PSJ ҳимоячиларига ўз жойларини эгаллаб олиш учун вақт тақдим этди.
Ушбу тактика айниқса Майкл Олисени зарарсизлантиришда қўл келди. Биринчи ўйинда гол урган франциялик вингер жавоб баҳсида деярли кўринмай қолди ва PSJ ҳимояси унга эркин ҳаракатланиш учун бўш ҳудуд қолдирмади. Луис Энриқуе эса бу деталлар журналистлар учун қизиқ бўлиши мумкинлигини, бироқ у рақибларига ўз сирларини очиб бермаслигини таъкидлади.
Эндиликда PSJ Будапештда бўлиб ўтадиган Чемпионлар лигаси финалида Арсенал жамоасига қарши майдонга тушади. Парижликлар ушбу баҳсда ғалаба қозониб, замонавий футбол тарихида совринни кетма-кет икки марта ҳимоя қилган иккинчи жамоага айланишни мақсад қилган.
“Zamin”ни Telegram'да ўқинг!
