Пойтахтимиздаги “Олимпия шаҳарчаси”да ўтаётган ўсмир қизлар ўртасидаги Осиё чемпионатида бугун ярим финал баҳслари бўлиб ўтди. Ўзбекистон терма жамоаси вакилалари ҳал қилувчи босқич йўлланмалари учун рингга кўтарилиб, мухлисларга ҳаяжонли, шиддатли ва эсда қоларли жанглар тақдим этишди.
Куннинг дастлабки жангида -46 кг вазндаги вакиламиз Руҳшонабону Аҳадова қозоғистонлик Милана Иншинага қарши рингга чиқди. Руҳшонабону жанг бошиданоқ ташаббусни қўлга олди ва рақибасига ўз услубини ўтказди. У 2-раундда техник нокаут орқали муддатидан аввал ғалаба қозониб, финалга йўл олди.
-48 кг вазнда Фарангиз Усвалиева япониялик Ариса Ёшинага билан куч синашди. Жанг жуда қизиқарли ва кескин ўтди. Афсуски, ҳакамлар қарорига кўра 0:5 ҳисобида япон боксчиси ғалаба қозонди. Фарангиз мусобақани бронза медали билан якунлади.
-50 кг вазнда Парвина Шакарова мўғулистонлик Аминхаир Зоригтсаиханга қарши рингга кўтарилди. Тўлиқ 3 раунд давом этган баҳсда ҳамюртимиз яққол устунлик кўрсатди ва 5:0 ҳисобида ишончли ғалаба қозониб, финал йўлланмасини қўлга киритди.
-52 кг вазнда Маржона Худойбердиева Вьетнам вакили Тхи Хонг Дием билан баҳс олиб борди. Якунда 0:4 ҳисобида рақиба устун келди ва Маржона бронза медали билан чекланди.
-54 кг вазнда Қумринисо Муҳаммадова ҳиндистонлик Лаҳми Манжунатга қарши жуда муросасиз жанг ўтказди. Баҳс давомида вакиламиз кучли характер, сабр ва рингдаги қатъиятни намойиш этди. Қумринисо 4:1 ҳисобида зафар қучиб, финалга чиқди.
-60 кг вазнда Саломатхон Сардорова хитойлик Хиню Суига қарши рингга чиқди. Ушбу қарама-қаршилик 3-раундда муддатидан аввал якунланди. Афсуски, Сардорова ярим финалда ўз юришини тўхтатди ва мусобақани бронза медали билан якунлади.
-63 кг вазнда Меҳримах Қиличева хитойлик Хинюелин Тианга қарши ажойиб жанг намойиш этди. Ҳамюртимиз рингда ишончли ҳаракат қилиб, 5:0 ҳисобида ғалаба қозонди ва финалга йўл олди. Бу жангда Меҳримах рақибасига деярли имконият бермади — тоза, ишончли ва “финалга билетни ўз қўли билан ёзиб олган” ғалаба бўлди.
-66 кг вазнда Диёра Бўрибоева хитойлик Ди Қиаога қарши баҳс юритди. Жанг жуда қизиқарли ва тенг курашлар остида кечди. Вакиламиз яхши ҳаракат қилган бўлса-да, ҳакамлар 2:3 ҳисобида ғалабани Хитой спортчисига беришди. Диёра мусобақани бронза медали билан якунлади.
-70 кг вазнда Карина Илмуратова қозоғистонлик Аилин Ҳожамбердиевага қарши рингга кўтарилди. Шиддатли кечган баҳсда Карина ўзининг тайёргарлиги ва иродасини кўрсатиб, 4:1 ҳисобида зафар қучди. Шу тариқа яна бир вакиламиз финал йўлланмасига эга чиқди.
-75 кг вазнда Лобар Шайманова қозоғистонлик Диана Надирбек билан баҳс олиб борди. Якунда 0:5 ҳисобида Қозоғистон вакиласи ғалаба қозонди. Лобар эса Осиё чемпионатини бронза медали билан якунлади.
-80 кг вазнда Ферузабону Камолова ҳиндистонлик Ваншикага қарши рингга чиқди. Жанг якунида ҳисоб 1:4 кўриниш олди ва Камолова ҳам бронза медалига сазовор бўлди.
Куннинг сўнгги жангида +80 кг вазндаги вакиламиз Соҳибахон Худойбердиева вьетнамлик Хан Ҳуен Труонг билан тўқнаш келди. Биринчи раундда Соҳибахон ҳисобда олдинга чиқди. Иккинчи раундда эса у рақибасига имконият қолдирмай, техник нокаут орқали ғалаба қозонди ва финалга йўл олди.
Шу тариқа, Ўзбекистон ўсмир қизлар терма жамоаси Осиё чемпионати ярим финалларида ёрқин иштирок этди. Бир нечта вакиламиз финалга чиққан бўлса, яна бир қатор боксчиларимиз бронза медалини қўлга киритди.
Ўзбекистон бокс федерацияси хабарига кўра, финал баҳсларида ҳам вакилаларимиз олтин медаль учун рингга кўтарилади. Бугунги жанглар яна бир нарсани исботлади: ўзбек қизлари рингда нафақат маҳорат, балки характер, жасорат ва ғалабага бўлган ишончни ҳам кўрсата олади. Энди финалда охирги қадам қолди — олтин учун зарба бериш вақти.
“Zamin”ни Telegram'да ўқинг!
