Бразилиялик ярим ҳимоячи Каземиро ўз фаолияти давомида бирга тўп сурган футболчилар ичида Гарет Бейлни энг мукаммал ўйинчи деб атади. У Реал Мадрид сафида бирга ўйнаган Криштиану Роналдуни алоҳида эътироф этса-да, айнан уелслик футболчининг майдондаги ҳар томонлама фойдали ҳаракатларини юқори баҳолади. Бу ҳақда Goal.com хабар беради.
Рио Фердинанднинг YouTube каналига берган интервюсида Каземиро Роналдунинг голлар борасидаги кўрсаткичлари феноменал эканлигини таъкидлади. Бироқ, унинг фикрича, Бейл ҳужумда ҳам, ҳимояда ҳам бирдек самарали ҳаракат қилиши, боши билан гол ура олиши ва стандарт вазиятлардан унумли фойдаланиши билан ажралиб турган.
"Криштиану — энг яхшиси, бу борада баҳс бўлиши мумкин эмас. Аммо умумий маҳорат ва ҳар томонлама мукаммаллик ҳақида гап кетганда, мен учун Гарет Бейл биринчи ўринда. У жуда тезкор, кучли ва майдоннинг ҳар бир нуқтасида фойдали эди", — деди Каземиро.
Гарет Бейл Реал Мадрид сафида ўтказган йилларида беш марта Чемпионлар лигаси ғолиби бўлган ва 106 та гол уришга эришган. Шунга қарамай, уелслик футболчи Испаниядаги фаолиятининг сўнгги йилларида мухлислар ва матбуот томонидан кўплаб танқидларга учраган эди.
“Zamin”ни Telegram'да ўқинг!
