Португалия миллий жамоаси 2026 йилги Жаҳон чемпионати учун якуний таркибини маълум қилди. Бош мураббий Роберто Мартинес бўлажак мундиалга энг кучли футболчиларни жалб этди. Қайдномада тажрибали юлдузлар билан бирга Европанинг етакчи клубларида тўп сураётган янги авлод вакиллари ҳам бор.
Дарвозабонлар рўйхатидан Диого Коста, Жозе Са, Руи Силва ва Рикардо Велхо ўрин олди. Бу позицияда Мартинесда етарлича танлов бор. Айниқса, Диого Коста сўнгги йилларда Португалиянинг асосий посбонларидан бири сифатида эътироф этилмоқда.
Ҳимоя чизиғи ҳам жуда салмоқли кўринади. Диого Далот, Жоао Канселу, Нуну Мендеш, Рубен Диаш, Гонсало Инасиу ва Томас Араухо каби футболчилар жамоага тажриба, тезлик ва тўп билан хотиржам ҳаракат қилиш имконини беради. Шунингдек, Матеус Нунес ва Нелсон Семеду ҳам таркибдан жой олган.
Ярим ҳимояда Португалиянинг энг катта кучи жамланган. Рубен Невеш, Жоао Невеш, Бруну Фернандеш, Бернарду Силва ва Витиня каби футболчилар майдон марказида ўйин суръатини бошқариш, ҳужумларни ташкил этиш ва рақиб босимига қарши тура олишда муҳим роль ўйнайди.
Ҳужум чизиғида эса Криштиану Роналду номи алоҳида эътибор тортади. Тажрибали юлдуз билан бирга Жоао Феликс, Педро Нету, Рафаэл Леау, Гонсалу Рамуш, Франсишку Консейсау ва Тринкау каби футболчилар ҳам мундиалга йўл олади. Бу эса Португалия ҳужумида тезлик, техника ва катта тажриба бирлашганини кўрсатади.
Португалиянинг ЖЧ-2026 учун якуний таркиби:
Дарвозабонлар:
Диого Коста “Порту”, Жозе Са “Вулверҳэмптон”, Руи Силва “Спортинг”, Рикардо Велхо “Генчлербирлиги”.
Ҳимоячилар:
Диого Далот “Манчестер Юнайтед”, Матеус Нунес “Манчестер Сити”, Нелсон Семеду “Фенербаҳче”, Жоао Канселу “Барселона”, Нуну Мендеш “ПСЖ”, Гонсало Инасиу “Спортинг”, Ренато Вейга “Вильярреал”, Рубен Диаш “Манчестер Сити”, Томас Араухо “Бенфика”.
Ярим ҳимоячилар:
Рубен Невеш “Ал Ҳилол”, Самуэл Коста “Мальорка”, Жоао Невеш “ПСЖ”, Бруну Фернандеш “Манчестер Юнайтед”, Бернарду Силва “Манчестер Сити”, Витиня “ПСЖ”.
Ҳужумчилар:
Жоао Феликс “Ан Наср”, Тринкау “Спортинг”, Франсишку Консейсау “Ювентус”, Педро Нету “Челси”, Рафаэл Леау “Милан”, Гонсало Гедеш “Реал Сосиедад”, Гонсалу Рамуш “ПСЖ”, Криштиану Роналду “Ан Наср”.
Эслатиб ўтамиз, Ўзбекистон миллий жамоаси Жаҳон чемпионати гуруҳ босқичида айнан Португалияга қарши майдонга тушади. Бу беллашув вакилларимиз учун катта синов бўлиши аниқ. Чунки Португалия таркибида деярли ҳар бир чизиқда жаҳон даражасидаги футболчилар жамланган.
Қисқаси, Роберто Мартинес мундиал учун ҳақиқатан ҳам кучли ва мувозанатли таркибни танлади. Португалияда Роналдунинг тажрибаси, Бернарду ва Брунунинг ақли, Леау ва Нетунинг тезлиги бор. Ўзбекистон учун эса бу ўйин катта саҳнада ўзини кўрсатиш имконияти бўлади.
“Zamin”ни Telegram'да ўқинг!
