Барселона спорт директори Деко жамоанинг асосий ҳужумчиси Роберт Левандовскининг ўрнини босадиган муносиб номзод топиш қанчалик қийин эканлиги ҳақида очиқ гапирди. У полшалик ҳужумчини сўнгги йилларнинг энг яхши форварди деб атаб, унинг кетиши жамоа учун катта йўқотиш бўлишини таъкидлади. Бу ҳақда Goal.com хабар беради.
Деко ESPN нашрига берган интервюсида: “Робертни алмаштириш деярли имконсиз. У сўнгги йилларнинг энг яхши ҳужумчиси. Барселона каби клубда бундай савиядаги ўйинчининг ўрнини тўлдириш жуда мураккаб, аммо футбол шундай тузилган. Биз қарорлар қабул қилишимиз ва жамоани кучайтиришимиз керак”, — дея тушунтириш берди.
Шунингдек, клуб мутасаддиси Челси ҳужумчиси Жоао Педро билан трансфер бўйича учрашгани ҳақидаги хабарларни рад этди. Аввалроқ матбуотда Деконинг Лондон шаҳрига айнан бразилиялик футболчи вакиллари билан гаплашиш учун боргани ҳақида маълумотлар тарқалган эди. “Мен Жоао Педро билан кўришиш учун борганим йўқ, бу нотўғри маълумот”, — деди у.
Роберт Левандовски 2022-йилда Барселона сафига қўшилганидан бери клубнинг ички чемпионатдаги нуфузини тиклашга катта ҳисса қўшди. У Каталония клуби билан жами 7 та соврин, жумладан, уч марта Ла Лига чемпионлигини қўлга киритди. Деко ҳужумчининг клуб тарихидаги ўрнини алоҳида эътироф этиб, унга миннатдорчилик билдирди.
Ҳозирда Барселона янги “тўққизинчи рақам” қидирувини давом эттирмоқда. Номзодлар орасида Атлетико Мадрид ҳужумчиси Хулиан Альварес ҳам бор, бироқ унга Арсенал ва PSJ каби клублар томонидан бўлаётган қизиқиш трансфер жараёнини қийинлаштириши мумкин. Деко клуб ҳозирча ҳеч кимни рўйхатдан чиқармаганини ва барча вариантлар кўриб чиқилаётганини қўшимча қилди.
“Zamin”ни Telegram'да ўқинг!
