Неймар ЖЧ-2026даги дебютидан сўнг кўз ёшларини тия олмади...
Бразилия миллий жамоаси ҳужумчиси Неймар 2026 йилги жаҳон чемпионатининг гуруҳ босқичидан ўрин олган Шотландияга қарши баҳсда узоқ танаффус ва жароҳатдан сўнг майдонга қайтди. 33 ёшли футболчи ўйиндан кейин ҳиссиётларини жиловлай олмай, кийиниш хонасида йиғлагани ва ўз мамлакатига ёрдам бера олаётганидан бахтиёр эканини билдирди.
Бразилия миллий жамоаси ҳужумчиси Неймар 2026 йилги жаҳон чемпионатидаги илк ўйинидан кейин ўз ҳиссиётлари билан ўртоқлашди.
33 ёшли футболчи гуруҳ босқичининг 3-туридан ўрин олган Шотландияга қарши учрашувнинг 76-дақиқасида Матеус Куня ўрнига майдонга тушди. Узоқ танаффус ва жароҳатдан кейин яна мундиал майдонига қайтган Неймар учун бу дақиқалар алоҳида аҳамият касб этди.
Футболчининг айтишича, учрашувдан кейин у ҳиссиётларини жиловлай олмаган.
«Ҳа, кийиниш хонасида йиғладим. Худога шукр, яна мамлакатимга ёрдам бера оляпман. Бундан жуда бахтлиман», — дея Неймарнинг сўзларини келтирди таниқли инсайдер Фабрицио Романо.
Бразилия миллий жамоаси мазкур баҳсда Шотландияни 3:0 ҳисобида ишончли мағлуб этди. Винисиус Жуниор дубль қайд этган бўлса, яна бир голни Матеус Куня урди.
Ушбу ғалабадан кейин Бразилия гуруҳ босқичини 7 очко билан биринчи ўринда якунлаб, плей-офф босқичига йўл олди.
Неймар эса жароҳатдан тикланганидан кейин ЖЧ-2026даги илк дақиқаларини айнан Шотландияга қарши баҳсда ўтказди. Унинг қайтиши плей-офф олдидан Бразилия учун муҳим воқеа бўлди.
Изоҳлар 0
…