Apple топ-менежери: «iPhone келгуси 10 йил ичида аҳамиятини йўқотиши мумкин»

Apple компаниясининг энг машҳур ва энг кўп фойдаланиладиган гаджетларидан бири — iPhone келажакда ўз мавқеини йўқотиб, ҳатто iPod каби тарих саҳифаларига кўмилиб қолиши мумкин. Бу ҳақда компаниянинг интернет хизматлари бўйича вице-президенти Эдди Кю АҚШда ўтказилаётган суд эшитувлари жараёнида маълум қилди, деб хабар беради The Verge нашри.

Мазкур суд муҳокамалари АҚШ ҳукуматининг Google ва Apple ўртасидаги ўзаро ҳамкорлик битими ҳақидаги тергови доирасида бўлиб ўтмоқда. Google ҳар йили Apple'га тахминан 20 миллиард доллар тўлаб, iPhone смартфонларида асосий қидирув тизими мақомини сақлаб келмоқда. Айни шу масала бўйича ўз фикрларини билдираётган Apple юқори лавозимли вакили, сунъий интеллект каби янги ва инновацион технологияларнинг ривожланиши натижасида смартфонлар ва улардаги анъанавий қидирув тизимлари ҳам ўз долзарблигини йўқотиши эҳтимолини таъкидлади.

Эдди Кюнинг фикрича, дунё технологик тараққиётнинг шундай нуқтасида турибдики, анъанавий қурилмаларнинг ўрнини сунъий интеллект бошқарувидаги янгича технологиялар эгаллаши мумкин:

«Биз нефть компанияси ёки тиш пастаси ишлаб чиқарувчи завод эмасмиз, улар абадий талабга эга. Гарчи бу ажабтовур эшитилса-да, эҳтимол, сизларга 10 йилдан кейин iPhone умуман керак бўлмай қолади», — деди Кю.

Apple вице-президентининг таъкидлашича, бу каби вазият компания тарихида аввал ҳам кузатилган. Масалан, 2000-йилларнинг бошида компаниянинг асосий маҳсулоти сифатида бозорга кириб келган ва оммавий машҳурликка эришган iPod плеерлари кейинчалик айнан iPhone қурилмалари пайдо бўлиши билан ўз аҳамиятини буткул йўқотган эди. Apple ҳатто бу ўзгаришни атайлаб амалга оширган эди:

«Ўша пайтда биз ўзимиз яратган iPod’ни яна ўзимиз чиқарган iPhone қурилмаси билан йўқ қилган эдик. Ҳозир эса навбат iPhone’га етиб келиши мумкин», — деб тушунтирди Кю.

Ҳозирги кунда iPhone Apple компаниясининг энг асосий ва энг йирик даромад манбаи ҳисобланади. Бу қурилмалар компаниянинг ҳар йиллик умумий даромадининг катта қисмини ташкил этади. Лекин Apple бугунги кунда iPhone'га тенг ва ундан ҳам кучлироқ даромад манбаси топишда қийинчиликларга учрамоқда. Хусусан, компаниянинг электромобильлар ишлаб чиқаришга уриниши муваффақиятсиз якунланди, VR-гарнитуралари бозорига кириб келиш эса компаниянинг умид қилганидек натижа бермади.

Шу билан бирга, Apple робототехника ва сунъий интеллект соҳасидаги тадқиқотларга катта сармоя киритмоқда. Компания, шунингдек, келажакда iPhone ўрнини босиши мумкин бўлган янги авлод қурилмалари, масалан, ақлли кўзойнаклар ишлаб чиқариш устида ҳам фаол иш олиб бормоқда.

Айтиш лозимки, бошқа компаниялар ҳам сунъий интеллект ва унинг атрофидаги янгича технологиялар ёрдамида смартфонлардан воз кечишга бир неча бор уриниб кўришган. Лекин ҳозирча бу борада кўпчилик муваффақиятсизликка учраган. Хусусан, Humane AI Pin деб номланган сунъий интеллект асосидаги ақлли пейжер лойиҳаси атиги бир йил давомида фаолият юритиб, кейин ёпилган бўлса, Rabbit R1 қурилмасидан фойдаланганларнинг 95 фоизи қурилмани бир йил ичида ташлаб қўйишган.

Бироқ, Apple компанияси ўзининг технологик ва молиявий имкониятлари билан бу тенденцияни ўзгартириш ва яна бир бор технологик дунёни ларзага солиши эҳтимолдан холи эмас.

Хўш, келажакда iPhone ўрнини сунъий интеллектли янги қурилмалар эгаллайдими ёки смартфонлар даври ҳали узоқ давом этадими — буни вақт кўрсатади. Аммо бир нарса аниқки, бу ўзгариш жараёнида Apple муҳим рол ўйнаши мумкин. «Замин»ни Telegram’да ўқинг!