OpenAI Джонни Айвнинг io стартапини $6,5 млрдга сотиб олди

OpenAI компанияси дизайнер Джонни Айв асос солган io стартапини $6,5 миллиардга сотиб олди, деб Habr хабар берди. Шу йўл билан компания сунъий интеллект асосидаги янги қурилмалар яратишни мақсад қилган.

Ушбу келишув ҳақида илк бор 2023 йили маълум бўлган, ўшанда Джонни Айв ва OpenAI бош директори Сэм Олтман янги, "AI даври қурилмаси" ҳақида музокаралар олиб боришган. Бироқ жараён фақат учрашувлар билан чекланганди. Энди эса келишув амалга ошди.

$6,5 миллиардлик битимнинг $5 миллиард қисми акцияларда тўланади. Харид жорий ёзда якунланиши кутилмоқда. Io компаниясида ChatGPT асосида фойдаланувчи ёрдамчи қурилма ишлаб чиқилаётгани тахмин қилинмоқда. Олтман таъкидлашича, янги қурилма смартфон ёки ноутбукни алмаштирмайди. "Бу бутунлай янги турдаги нарса бўлади", — деди у. Қурилманинг 2026 йилда тақдим этилиши режалаштирилган.

Io жамоасидан 55 нафар муҳандис OpenAI’га ўтади. Айвнинг ўзи OpenAI’да ишламайди, унинг дизайнерлик студияси LoveFrom эса мустақил ҳолда қолади. Шунингдек, LoveFrom OpenAI’нинг барча дизайн ишларини ўз зиммасига олади — фақат қурилмалар эмас, балки ChatGPT каби дастурий маҳсулотлар учун ҳам.

Джонни Айв 1992–2019 йилларда Apple’да ишлаган. У iMac, iPod, iPhone, iPad ва бошқа кўплаб машҳур маҳсулотларни дизайн қилган. Айв 2013 йилда iOS 7 учун тубдан янгиланган интерфейсни, кейинчалик esa macOS учун янги кўринишни тақдим этган.

Apple’дан кетгандан сўнг, Айв LoveFrom студиясини очди. Унинг мижозлари орасида Apple, Airbnb ва Ferrari бор. 2023 йилда LoveFrom британ бренди Linn учун винил проигриватель дизайни билан шуғулланди. «Замин»ни Telegram’да ўқинг!