Meta компанияси Facebook ва Instagram платформаларида 13 ёшга тўлмаган фойдаланувчиларни аниқлаш учун янги сунъий интеллект технологиясини жорий этмоқда. Тизим фойдаланувчиларнинг бўйи ва суяк тузилиши каби визуал белгиларни таҳлил қилиш орқали уларнинг ёшини тахминий баҳолайди. Компания вакилларининг таъкидлашича, бу жараён юзни таниш технологияси эмас, балки умумий визуал маълумотларга асосланган таҳлилдир. Бу ҳақда Techcrunch.com хабар беради.
Янги тизим матнли хабарлар ва фойдаланувчиларнинг ўзаро мулоқотлари билан биргаликда ишлайди. Масалан, туғилган кун нишонланиши ёки мактабдаги синфлар ҳақидаги эслатмалар каби контекстуал белгилар ҳам ҳисобга олинади. Агар тизим фойдаланувчини вояга етмаган деб топса, унинг аккаунти вақтинча чекланади ва ёшни тасдиқловчи ҳужжатлар талаб қилинади.
Ушбу янгилик Ню-Мексико штатидаги суд қароридан сўнг амалга оширилмоқда. Суд Meta компаниясини платформалар хавфсизлиги борасида истеъмолчиларни чалғитганликда айблаб, 375 миллион доллар жаримага тортган эди. Компания ушбу чоралар орқали болалар хавфсизлигини таъминлаш ва суд талабларини бажаришни мақсад қилган.
Шунингдек, Meta Instagram платформасидаги "Теен Аccоунтс" функциясини Европа Иттифоқи ва Бразилия каби 27 та давлатга кенгайтирмоқда. Ушбу функция ўсмирлар учун хавфсизлик чораларини кучайтиради: хабарларни фақат танишларидан қабул қилиш, зарарли изоҳларни яшириш ва аккаунтни автоматик тарзда ёпиқ режимга ўтказиш шулар жумласидан.
“Zamin”ни Telegram'да ўқинг!
