Meta компанияси Instagram Директ шахсий хабарларида қўлланиладиган Э2EE (сквозноэ шифрлаш) технологиясини ўчириб ташлади. Илгари ушбу функцияни «махфийликнинг олтин стандарти» деб атаган компания, эндиликда ходимлар фойдаланувчиларнинг матнли хабарлари, фотосуратлари ва видеоларига кириш имкониятига эга бўлишини тасдиқлади. Бу ҳақда Ixbt.com хабар беради.
2019-йилдан буён «махфий келажак» сари қадам ташлаб, Facebook Мессенгер ва Instagram'да шифрлашни жорий этган Meta, кутилмаганда ушбу сиёсатдан қайтди. Компания вакилларининг таъкидлашича, ушбу функцияга фойдаланувчилар томонидан талаб паст бўлган, шу сабабли уни мажбурий қилишдан воз кечилган.
Танқидчилар эса бу қарор ортида бошқа мақсадлар яширинган бўлиши мумкинлигини тахмин қилмоқда. Хусусан, хабарларга кириш имконияти Meta'га реклама тизимларини такомиллаштириш ва сунъий интеллект маҳсулотларини ривожлантириш учун қимматли маълумотлар базасини тақдим этади. Компания эса хабарлар нейротармоқларни ўқитиш учун ишлатилмаслигини даъво қилмоқда.
Ушбу ўзгариш жамоатчиликда турлича қарши олинди. Болалар ҳуқуқларини ҳимоя қилувчи ташкилотлар шифрлашнинг йўқлиги ноқонуний хатти-ҳаракатларни аниқлашни осонлаштиришини таъкидлаб, қарорни қўллаб-қувватлади. Рақамли махфийлик тарафдорлари эса буни хавфсизлик стандартларидан чекиниш ва фойдаланувчилар ишончига путур етказувчи хавфли сигнал деб баҳоламоқда.
“Zamin”ни Telegram'да ўқинг!
