Sony компанияси ўзининг тақиладиган иқлим назорати қурилмасининг янги авлодини намойиш этди. Реон Поккет Pro Plus деб номланган ушбу ихчам гаджет бўйинга тақилади ва тана ҳароратини самарали бошқариш имконини беради. 2019-йилдан буён Японияда ривожланиб келаётган ушбу технология эндиликда Европа ва АҚШ бозорларига ҳам кириб бормоқда. Бу ҳақда Ixbt.com хабар беради.
Янги моделнинг асосий афзаллиги совутиш самарадорлигининг аввалги авлодга нисбатан 20 фоизга ошганидир. Компания маълумотларига кўра, совутиш плитаси ҳарорати қўшимча 2 даражагача пасайиши мумкин, бу эса иссиқ ҳавода фойдаланувчига янада кўпроқ салқинлик ҳиссини тақдим этади. Шунингдек, қурилма конструкцияси ҳам қайта ишлаб чиқилган бўлиб, унда мослашувчан бўйин маҳкамлагичи ва иссиқ ҳавони кийим остида тўпланиб қолишидан сақловчи созланувчан ҳаво чиқариш канали мавжуд.
Қурилма ичида иккита термомодул ва тери ҳароратини ўлчовчи сенсорлар ўрнатилган. Фойдаланувчилар махсус илова орқали керакли ҳароратни белгилашлари ёки ақлли режимлардан фойдаланишлари мумкин, улар атроф-муҳит шароитига қараб автоматик тарзда мослашади. Шунингдек, қурилмани смартфонсиз, корпусдаги тугмалар ёрдамида ҳам бошқариш имконияти сақлаб қолинган.
Реон Поккет Pro Plus батареяси тахминан 15 соатлик узлуксиз ишлашга мўлжалланган. Тизимнинг аниқлигини янада ошириш учун қўшимча Реон Поккет Таг 2 сенсори ҳам тақдим этилган бўлиб, у атроф-муҳитдаги ҳарорат ва намлик даражасини доимий равишда кузатиб боради.
“Zamin”ни Telegram'да ўқинг!
