Xiaomi компанияси минималист дизайнга эга янги Mijia душ тизимини намойиш қилди. Ҳозирда маҳсулот компаниянинг краудфандинг платформасида йиғим босқичида бўлиб, унинг нархи иштирокчилар учун 900 юан (135 доллар), чакана савдода эса 1100 юан (160 доллар) этиб белгиланган. Бу ҳақда Ixbt.com хабар беради.
Янги қурилманинг асосий хусусияти — 305 мм ўлчамдаги катта душ боши ва шампун ҳамда бошқа аксессуарлар учун мўлжалланган 370 мм кенгликдаги ўрнатилган токча ҳисобланади. Xiaomi нафақат ташқи кўринишга, балки кундалик фойдаланиш қулайлигига ҳам катта эътибор қаратган.
Тизим сув оқимини бошқариш учун алоҳида тугмали панел билан жиҳозланган: ҳар бир режим учун алоҳида тугма мавжуд. Шунингдек, ҳароратни аниқроқ созлаш имконини берувчи силлиқ механик ростлаш тизими қўлланилган.
Олд панел чиниқтирилган шишадан ишланган, ички қисмлар ва корпус эса антибактериал гуруч қотишмасидан тайёрланган. Xiaomi таъкидлашича, бу ечим тизимнинг чидамлилигини оширади ва уни намлик ҳамда кирлардан ҳимоя қилади.
Душ тизими сув беришнинг тўрт хил режимини қўллаб-қувватлайди ва бир вақтнинг ўзида бир нечта сув каналларидан фойдаланиш имконини беради. Масалан, фойдаланувчилар юқори душ ва қўл душини бир вақтда ёқиши ҳамда тугмани бир марта босиш орқали режимларни тезда алмаштириши мумкин.
“Zamin”ни Telegram'да ўқинг!
