Google ўзининг қидирув тизимида амалга оширган кенг кўламли ўзгаришларидан сўнг, кўплаб фойдаланувчилар сунъий интеллект (AI) мажбуран тиқиштирилаётганидан норози бўлиб, ДуккДуккГо платформасига ўтишни бошлади. Google И/О конференциясида анъанавий кўк ҳаволалар ўрнини сўровларга жавоб берувчи ва вазифаларни бажарувчи AI агенти эгаллаши эълон қилинган эди. Бироқ, бу янгилик кўпчиликда қидирув натижаларининг аниқлиги ва фойдаланувчи назорати йўқолиши борасида хавотир уйғотди. Бу ҳақда Techcrunch.com хабар беради.
ДуккДуккГо бош директори Габриел Веинбергнинг таъкидлашича, Google фойдаланувчиларга рад этиш имкониятини қолдирмасдан сунъий интеллектни мажбуран тақдим этмоқда. Унинг сўзларига кўра, бу қидирув натижаларининг сифатини яхшилаш ўрнига, уларни ёмонлаштирмоқда. ДуккДуккГо эса фойдаланувчиларга AI функцияларидан қанчалик фойдаланишни ўзлари ҳал қилиш имконини берувчи хавфсиз ҳудуд бўлишни мақсад қилган.
Статистик маълумотларга кўра, 20-майдан 25-майгача бўлган даврда ДуккДуккГо иловасининг АҚШдаги юкламалари ҳафталик ўртача 18,1 фоизга ошган ва 25-май куни ўсиш кўрсаткичи 30,5 фоизга етган. iOS платформасида эса бу кўрсаткич янада юқори бўлиб, ҳафталик ўсиш ўртача 33 фоизни, энг юқори нуқтада эса қарийб 70 фоизни ташкил этди.
Шунингдек, фойдаланувчилар ДуккДуккГо платформасининг сунъий интеллектдан бутунлай холи бўлган ноаи.duckduckgo.com саҳифасига ҳам фаол ўтмоқдалар. Ушбу саҳифага ташрифлар сони ўртача 22,7 фоизга кўпайган. Бу саҳифада AI ёрдамида тайёрланган жавоблар ва генерация қилинган тасвирлар каби функциялар стандарт ҳолатда ўчириб қўйилган бўлиб, бу оддий ва аниқ қидирувни афзал кўрувчилар учун қулайлик яратмоқда.
“Zamin”ни Telegram'да ўқинг!
