Google ўз қидирув тизимига сунъий интеллект функцияларини фаол жорий қилиши ортидан DuckDuckGo платформасининг юклаб олиниши ва ташриф буюрувчилар сони кескин ошди. Google ишлаб чиқувчилар конференциясида анъанавий ҳаволалар рўйхати ўрнини AI-жавоблар эгаллаган янги қидирув версиясини тақдим этган эди. Тизим эндиликда маълумотларни умумлаштириш, мураккаб вазифаларни бажариш ва мулоқот режимида ишлаш имкониятига эга. Бу ҳақда Ixbt.com хабар беради.
Бироқ, кўплаб фойдаланувчилар ушбу ўзгаришларни салбий кутиб олди. Танқидчиларнинг фикрича, AI-хулосалар қидирув сифатини ёмонлаштиради ва мустақил сайтлар ҳамда медиа ресурсларига ўтувчи трафикни камайтиради. Сунъий интеллект функцияларини ўчириб қўйиш имконияти чеклангани ва улар оддий қидирувга чуқур интеграция қилингани одамларнинг норозилигига сабаб бўлмоқда.
Ушбу фонда DuckDuckGo АҚШда иловани ўрнатиш кўрсаткичи 20-25-май кунлари ўртача 18,1 фоизга ошганини қайд этди. Apple iOS платформасида эса юклаб олишлар ўртача 33 фоизга, айрим кунларда эса қарийб 70 фоизга ўсган. Шунингдек, фойдаланувчилар орасида AI-хулосаларсиз ва автоматик яратилган тасвирларсиз ишлайдиган махсус қидирув режимига қизиқиш 22,7 фоизга ортган.
DuckDuckGo асосчиси Габриел Веинберг Google йўналишини танқид қилиб, фойдаланувчиларга AI функциялари мажбуран тиқиштирилаётганини таъкидлади. Шунга қарамай, DuckDuckGo ҳам сунъий интеллектдан бутунлай воз кечмаган. Компания Anthropic, OpenAI ва Meta моделларидан фойдаланиш имконини берувчи Duck.ai хизматини ривожлантирмоқда, бироқ у ерда фойдаланувчи махфийлиги ва маълумотлар хавфсизлигига асосий урғу берилади.
Ҳозирда Браве, Ecosia ва Startpage каби муқобил қидирув тизимлари ҳам фаоллашган. Вазият шуни кўрсатмоқдаки, йирик платформалар қидирувни сунъий интеллект билан мулоқотга айлантираётган бир пайтда, фойдаланувчиларнинг бир қисми оддий ҳаволалар, манбаларни қўлда танлаш ва жараённи мустақил назорат қилишни афзал кўрмоқда.
“Zamin”ни Telegram'да ўқинг!
