Пайшанба куни Meta компаниясига сотилган Окулус асосчилари томонидан ташкил этилган Сескаме стартапи ўзининг янги iOS иловасини оммага тақдим этди. Бир йилдан ортиқ вақт давомида ишлаб чиқилган ушбу лойиҳа ChatGPT каби анъанавий чатботлардан фарқли равишда, фойдаланувчи билан табиий мулоқот қила оладиган сунъий интеллект агентларини таклиф этади. Тизимнинг ўзига хослиги шундаки, у маълумотни қидириш ва жавоб бериш жараёнини инсон нутқига яқинлаштирган. Бу ҳақда Techcrunch.com хабар беради.
Сескаме технологияси бир вақтнинг ўзида бир нечта параллел қидирувларни амалга ошириш имконини беради. Бу эса сунъий интеллектга гапираётган вақтида янги маълумотларни нутққа қўшиш ёки фикрини ўртада ўзгартириш имконини беради. Иловада тўртта турли хил агент — Мая, Милес, Симоне ва Чарлие мавжуд бўлиб, уларнинг ҳар бири ўз овози, характери ва хотирасига эга. Аввалроқ ўтказилган тадқиқот босқичида ушбу агентлардан бир неча ҳафта ичида миллиондан ортиқ киши фойдаланган эди.
Иловада фойдаланувчилар учун қулай бўлган бир қатор функциялар, жумладан, визуал маълумотлар учун қидирув карталари, эслатмалар ёзиш режими ва махфий суҳбатлар учун "инкогнито" режими жорий этилган. Шунингдек, овоз чиқариб гапириш имкони бўлмаган ҳолатлар учун матнли режим ҳам мавжуд. Компания инвесторлари орасида машҳур Сеқуоиа жамғармаси бор бўлиб, стартап яқинда 250 миллион доллар миқдорида инвестиция жалб қилган.
Сескаме жамоасининг режалари фақат мобил илова билан чекланиб қолмайди. Компания 2027-йилда ақлли кўзойнакларни чиқаришни мақсад қилган. Келажакда ушбу агентлар нафақат саволларга жавоб бериши, балки фойдаланувчи номидан муайян ҳаракатларни ҳам бажариши кутилмоқда. Ҳозирда iOS иловаси 39 та давлатда бепул фойдаланиш учун очиқ, бироқ рўйхатдан ўтишда навбат кутиш талаб этилиши мумкин. Android фойдаланувчилари учун эса илова кейинроқ тақдим этилади.
“Zamin”ни Telegram'да ўқинг!
