Ўзбекистон ташқи интернет каналининг тезлиги сониясига 1800 Гбитга етказилади

«Ўзбектелеком» АК халқаро пакетли коммутация марказининг ўтказувчанлик қобилиятини кенгайтирилиб, интернет тезлиги 1800 Гбит/сонияга етказилади. Лойиҳанинг техник-иқтисодий параметрлари Вазирлар Маҳкамасининг 17 апрелдаги қарори билан қабул қилинган, деб хабар беради Normа. Ҳужжатда лойиҳани амалга ошириш муддати кўрсатилмаган.

Ҳужжатга кўра, лойиҳа танловда ғолиб чиққан АҚШнинг Winncom Technologies компанияси томонидан амалга оширилади.
Лойиҳанинг техник-иқтисодий асоси бўйича умумий қиймати 25,9 миллион долларни ташкил этади. Жумладан:

• «Ўзбектелеком» АК BNG ва DPI қурилмаларининг ўтказувчанлик қобилиятини кенгайтириш учун — 4,97 миллион доллар:
• «Ўзбектелеком» АК маълумотлар узатиш тармоғининг ўтказувчанлик қобилиятини кенгайтириш учун — 4,99 миллион доллар;
• «Ўзбектелеком» АК халқаро пакетли коммутация марказини ўтказувчанлик қобилиятини кенгайтириш учун — 4,98 миллион доллар;
• «Ўзбектелеком» АК маълумотлар узатиш ядро тармоғида хизматлар кўрсатишнинг ўтказувчанлик қобилиятини кенгайтириш учун — 4,99 миллион долларлик машина ва ускуналар харид қилиниши маълумот учун қабул қилинди.

Лойиҳа «Алоқабанк»нинг умумий қиймати 19,9 миллион доллар миқдоридаги кредити, шунингдек, «Ўзбектелеком» АКнинг 5,9 миллион доллар миқдоридаги ўз маблағлари ҳисобида молиялаштирилади. “Замин” янгиликларини “Telegram”да кузатиб боринг