Кичик одатлар — катта натижа. Илмий тадқиқотлар шуни кўрсатмоқдаки, ҳар куни атиги беш дақиқа қўшимча жисмоний ҳаракат қилиш ва ўтириб ўтказиладиган вақтни камайтириш инсон умрини сезиларли даражада узайтириши мумкин. Мутахассислар бу оддий ўзгаришлар жамият саломатлиги учун катта аҳамиятга эга эканини таъкидламоқда.
Буюк Британия, АҚШ, Норвегия ва Швециядан 135 минг нафар иштирокчи қатнашган тадқиқот натижаларига кўра, кунига беш дақиқа тез юриш каби ўртача жисмоний фаоллик ўлим хавфини тахминан 10 фоизга камайтиради. Яъни, қисқа ҳаракат ҳам саломатлик учун жиддий фойда келтиради.
Норвегия Спорт фанлари мактаби раҳбарлигида ўтказилган таҳлилда эса ўтириш вақти кунига 30 дақиқага қисқартирилганда, барча сабабларга кўра ўлим ҳолатлари қарийб 7 фоизга камайиши аниқланган. Мутахассисларга кўра, кўпроқ ҳаракат ва камроқ ўтириш — соғлом ҳаётнинг асосий қоидаларидан бири.
Энг катта ижобий самара айнан жисмоний фаолликни камида беш дақиқага ошириш билан боғлиқ. Тез юриш, уй юмушлари ёки боғда ишлаш каби машғулотлар нафасни тезлаштириб, организмни фаоллаштиради. Ўтириб ўтказиладиган вақт эса енгил ҳаракатлар билан алмаштирилиши тавсия этилади.
Қизиғи шундаки, яна бир тадқиқот уйқу, ҳаракат ва овқатланишдаги майда ижобий ўзгаришлар биргаликда умрни янада узайтиришини кўрсатган. Масалан, беш дақиқа кўпроқ ухлаш, икки дақиқа қўшимча жисмоний фаоллик ва кунига ярим порция сабзавот кўпроқ истеъмол қилиш соғлом одатларга эга бўлмаган инсонга қўшимча бир йил умр “совға” қилиши мумкин.
Мутахассислар таъкидлашича, энг мақбул турмуш тарзи — кунига 7–8 соат уйқу, камида 40 дақиқа жисмоний фаоллик ва мувозанатли овқатланишдан иборат. Бу қоидаларга амал қилганлар бошқаларга нисбатан деярли 10 йил кўпроқ умр кўриши мумкин.
Қисқаси, катта ўзгаришлар учун катта қадам шарт эмас — беш дақиқа ҳам етарли.
“Zamin”ни Telegram'да ўқинг!
