Xitoyning XPeng kompaniyasi dunyodagi ilk “aqlli zavod”da vertikal uchish va qo‘nishga qodir uchuvchi avtomobillarni ommaviy ishlab chiqarishni boshladi, deb xabar berdi “Sinxua”.
Ma’lumotlarga ko‘ra, zavod mamlakatning janubida joylashgan bo‘lib, u Land Aircraft Carrier deb nomlangan gibrid transport vositasini ishlab chiqarmoqda. U yerda olti g‘ildirakli avtomobil va undan ajraladigan elektr uchish moduli yig‘iladi.
Korxona yiliga 10 mingta uchish apparati ishlab chiqarish quvvatiga ega, hozircha esa 5 mingta mahsulot sinov asosida tayyorlanmoqda. To‘liq ishga tushgach, har yarim soatda bittadan apparat tayyor bo‘ladi.
XPeng ma’lumoticha, kompaniya allaqachon 5 mingga yaqin buyurtma olgan va ommaviy yetkazib berish 2026 yilda boshlanadi.
Uchuvchi avtomobil avtomatik va qo‘lda boshqarish rejimiga ega bo‘lib, bir tugmada uchish va qo‘nishni amalga oshira oladi. Uning uzunligi taxminan 5,5 metrni tashkil etadi va oddiy haydovchilik guvohnomasi bilan yo‘lda harakatlanishi mumkin.
Muttaxassislar ta’kidlashicha, bu texnologiya shaharlar orasida tez, ekologik va xavfsiz harakatlanishning yangi davrini boshlab berishi mumkin.
“Zamin”ni Telegramʻda oʻqing!
