Rossiyaning Kaliningrad shahridagi "Avtotor" zavodi Changan brendining Uni-T krossoverini yig'ish uchun ruxsatnoma oldi. Ushbu hujjat 2027-yilning apreliga qadar amal qiladi. Bu haqda Ixbt.com xabar beradi.
Rossiyada ishlab chiqariladigan versiya Xitoydan import qilinadigan model bilan to'liq bir xil bo'ladi. Avtomobilning uzunligi 4515 mm, g'ildiraklar bazasi esa 2710 mm ni tashkil etadi.
Krossover kapoti ostida 167 ot kuchiga ega 1,5 litrli benzinli turbo dvigatel o'rnatilgan. Dvigatel Yevro-5 ekologik standartiga javob beradi va 92-markali benzinga mo'ljallangan.
U 7 pog'onali robot uzatmalar qutisi bilan birga ishlaydi.
Mahalliylashtirilgan versiyaning bazaviy to'plamiga xavfsizlik yostiqchalari, avtomatik iqlim nazorati va shinalar bosimini nazorat qilish tizimi kiradi. Qo'shimcha opsiyalar qatorida tom qismidagi lyuk hamda isitiladigan ko'zgular mavjud.
Hozircha Rossiyada yig'ilgan avtomobillar narxga qanday ta'sir qilishi noma'lum. Ayni paytda Xitoyda ishlab chiqarilgan Changan Uni-T Rossiyada 2,24 milliondan 3,46 million rublgacha bo'lgan narxlarda sotilmoqda.
“Zamin”ni Telegramʻda oʻqing!
