BMW kompaniyasining AQShdagi boʻlinmasi yangi BMW iX3 50 xDrive elektr krossoverining texnik koʻrsatkichlarini eʼlon qildi. EPA baholash tizimiga koʻra, mazkur model bir marta quvvatlanish orqali 700 kilometrgacha masofani bosib oʻta oladi. Biroq, bu koʻrsatkich tanlangan shinalarga bogʻliq: 20-dyuymli yozgi shinalar bilan 700 km masofani zabt etish mumkin boʻlsa, mavsumiy shinalar bilan bu koʻrsatkich 615 km atrofida boʻladi. Bu haqda Ixbt.com xabar beradi.
Yangi modelning narx siyosati ham eʼtiborga molik. Elektr dvigatelli BMW iX3 50 xDrive 62 850 dollardan boshlansa, benzinli BMW X3 M50 xDrive 67 850 dollarni tashkil etadi. Qizigʻi shundaki, elektr versiya 463 ot kuchiga ega boʻlib, benzinli variantdagi 393 ot kuchidan sezilarli darajada ustunroqdir.
Avtomobilning yana bir muhim afzalligi — 400 kVt quvvatgacha boʻlgan oʻta tezkor quvvatlash tizimini qoʻllab-quvvatlashi. Kompaniya maʼlumotlariga koʻra, bu texnologiya atigi 10 daqiqa ichida 300 km masofaga yetarli quvvat toʻplash imkonini beradi. Bu koʻrsatkich bilan BMW oʻzining asosiy raqobatchisi Tesla Model Y modelidan ham ustunlik qilmoqda.
Hozirgi kunda AQSh bozorida BMW iX3 50 xDrive uchun buyurtmalar qabul qilinmoqda. Mijozlar avtomobilni bron qilish uchun 1000 dollar miqdorida depozit toʻlashlari kerak. Yangi krossoverlarning ilk egalariga yetkazib berilishi sentyabr oyidan boshlanishi rejalashtirilgan.
“Zamin”ni Telegramʻda oʻqing!
