JCB vodorodli Hydromax bilan yangi tezlik rekordini o'rnatmoqchi

JCB kompaniyasi avgust oyida vodorod yoqilg'isida ishlaydigan yangi avtomobil yordamida quruqlikdagi tezlik bo'yicha navbatdagi rekordni yangilashni rejalashtirmoqda. Dieselmax loyihasidan 20 yil o'tib taqdim etilayotgan Hydromax nomli ushbu texnika 32 fut (taxminan 9,7 metr) uzunlikka ega. Bu haqda Autocar.co.uk xabar beradi.

Avtomobil kompaniyaning o'zida ishlab chiqilgan va ikkita yonish dvigatelini birlashtirgan quvvat qurilmasi bilan jihozlangan. Uning umumiy quvvati 1579 ot kuchini tashkil etadi. Loyiha 100 million funt sterling qiymatiga ega bo'lib, besh yil davomida Prodrive muhandislik firmasi bilan hamkorlikda amalga oshirildi.

Hydromax sinovlari kelasi oy boshlanadi, avgust oyining 1-7 kunlari esa Yuta shtatidagi Bonneville Salt Flats hududida bo'lib o'tadigan an'anaviy Bonneville Speedweek musobaqasida ishtirok etadi. Aynan shu joyda 2006-yilda Dieselmax 350,092 milya/soat tezlik bilan dizel dvigatelli avtomobillar rekordini o'rnatgan edi.

JCB raisi Lord Bamfordning so'zlariga ko'ra, asosiy maqsad — vodorod texnologiyalarining ekologik tozaligini va imkoniyatlarini namoyish etish orqali Dieselmax rekordini yangilashdir. Avtomobilni boshqarish uchun 1997-yilda tovush tezligini quruqlikda yengib o'tgan afsonaviy uchuvchi Endi Grin taklif etilgan.