Stellantis kompaniyasi Dongfeng bilan yangi hamkorlik shartnomasini imzoladi. Ushbu kelishuvga ko‘ra, Xitoyning Uxan shahridagi zavodda kelgusi yildan boshlab ikkita yangi Peugeot va ikkita yangi Jeep modeli ishlab chiqariladi. Ushbu avtomobillar nafaqat Xitoy bozori, balki global eksport uchun ham mo‘ljallangan. Bu haqda Autocar.co.uk xabar beradi.
Yangi Peugeot modellari Pekin avtosalonida namoyish etilgan Concept 6 va Concept 8 prototiplari asosida yaratiladi. Ular orasida 508 modeliga o‘xshash o‘ziga xos kuzovli avtomobil va fransuz brendi tarixidagi eng yirik krossover bo‘lishi kutilayotgan flagman model mavjud. Jeep brendi ostida esa yangi avlod yo‘ltanlamas elektromobillari ishlab chiqarilishi rejalashtirilgan.
Loyiha qiymati 1 milliard yevroni tashkil etadi, shundan 130 million yevrosi Stellantis tomonidan kiritiladi. Ushbu hamkorlik Xubey provinsiyasi va Uxan ma’muriyatining avtomobilsozlik sohasidagi qo‘llab-quvvatlovchi siyosatiga asoslanadi. Bu qadam Stellantis kompaniyasining Xitoydagi ishlab chiqarish quvvatlarini kengaytirish strategiyasining bir qismidir.
Peugeot bosh direktori Alen Faveyning ta’kidlashicha, ushbu modellar kompaniyaning Xitoy texnologiyalaridan foydalangan holda global bozor talablariga moslashishini sinovdan o‘tkazadi. Uning so‘zlariga ko‘ra, Dongfeng tomonidan taqdim etilgan ayrim texnologiyalar Yevropa standartlaridan ham ilg‘orroq bo‘lishi mumkin.
“Zamin”ni Telegramʻda oʻqing!
