“Nijegorodskie gruzovie avtomobili” korxonasida yangilangan Valday 45 Pro magistral tyagachini ishlab chiqarishga start berildi. Ushbu model birinchi versiyaning chuqur modernizatsiyasi natijasi boʻlib, transport kompaniyalarining talab va istaklarini inobatga olgan holda takomillashtirilgan. Bu haqda Ixbt.com xabar beradi.
Avtomobilning asosiy texnik oʻzgarishi uning kuch agregatida namoyon boʻladi: dvigatel quvvati endilikda 490 ot kuchiga yetkazilgan. Shuningdek, transmissiya ham qayta koʻrib chiqilib, asosiy uzatmaning uzatish soni 2,714 gacha pasaytirildi. Bu oʻzgarish trassada harakatlanish samaradorligini sezilarli darajada oshirishi kutilmoqda.
Yangi Valday 45 Pro yonilgʻi baklarining umumiy hajmi 1040 litrgacha kengaytirilishi hisobiga uzoq masofalarga toʻxtovsiz yurish imkoniyatiga ega boʻldi. Tashqi koʻrinishda esa toʻliq svetodiodli optika va yangilangan eksterier elementlari koʻzga tashlanadi. Salon ichida yangi asboblar paneli, takomillashtirilgan multimedia tizimi va smartfonni ulash funksiyasi paydo boʻldi.
Xavfsizlik tizimlari qatoriga favqulodda tormozlash, tepalikka koʻtarilishda yordam berish va haydovchining holatini monitoring qilish tizimlari kiritilgan. Shuningdek, manevr qilishni osonlashtirish uchun avtomobilga atrofni toʻliq koʻrish imkonini beruvchi kameralar oʻrnatilgan.
Valday 45 Pro ishlab chiqarish jarayoni payvandlash, boʻyash va yigʻishni oʻz ichiga olgan toʻliq siklda amalga oshirilmoqda. Tyagachga Rossiyada ishlab chiqarilgan telematika tizimlari, shinalar, akkumulyatorlar, avtonom isitgichlar va oynalar kabi koʻplab butlovchi qismlar oʻrnatilmoqda.
“Zamin”ni Telegramʻda oʻqing!
