Yangi Ferrari Luce taqdim etilganidan soʻng, ijtimoiy tarmoqlarda uning tashqi koʻrinishi borasida qizgʻin bahslar avj oldi. Koʻpchilik avtomobilning dizaynini tanqid qilayotgan boʻlsa-da, uning texnik innovatsiyalari eʼtibordan chetda qolmoqda. Yarim million funt sterlinglik ushbu superkar nafaqat Ferrari brendining kelajagini, balki hamyonbop elektromobil bozoriga taʼsir qilishi mumkin boʻlgan yangi texnologiyalarni ham oʻzida mujassam etgan. Bu haqda Autocar.co.uk xabar beradi.
Avtomobilning eng qiziqarli jihatlaridan biri uning ovoz tizimidir. Bu sunʼiy yaratilgan shovqin emas, balki mexanik qismlarning haqiqiy ish jarayonidagi tovushlari boʻlib, ular kuchaytirilgan holda salonga uzatiladi. Shuningdek, rul ostidagi “quloqchalar” (flappy paddles) vites almashinuvi uchun emas, balki quvvat va tormozlanish darajasini boshqarish uchun xizmat qiladi. Bu tizim haydovchiga 1036 ot kuchiga ega dvigatelni burilishlarda samaraliroq boshqarish imkonini beradi.
Luce modelining interyeri hozirda dunyodagi eng yaxshilaridan biri deb hisoblanmoqda. Materiallar sifati va foydalanish qulayligi yuqori darajada. Biroq, aerodinamika boʻyicha oʻtkazilgan muhokamalarda maʼlum boʻlishicha, avtomobilning dastlabki dizayn modellari seriyali ishlab chiqarish variantidan ancha jozibaliroq boʻlgan. Ehtimol, muhandislik talablari va aerodinamik ehtiyojlar LoveFrom agentligi taklif qilgan estetik goʻzallikdan ustun kelgandir.
Dizayner Marc Newson va Ferrari muhandislari oʻrtasidagi hamkorlik natijasida yaratilgan ushbu krossover shaklidagi superkar, brendning anʼanaviy chiziqlaridan biroz uzoqlashgan. Shunga qaramay, Ferrari Luce texnik jihatdan mukammallikka intilayotganini inkor etib boʻlmaydi. Kelajakda ushbu texnologiyalar oddiyroq xatchbek va sedanlarda qoʻllanilishi avtomobil sanoatida yangi davrni boshlab berishi mumkin.
“Zamin”ni Telegramʻda oʻqing!
